നിങ്ങളുടെ കാഴ്ചയില് അവര് ദ്വൈതത്തിലാണ്. പക്ഷേ അവര് ആ അനുഭൂതിയില്ത്തന്നെയാണ്. അരിപ്പൊടിയുടെ കൂടെ ശര്ക്കര ചേര്ത്തുകഴിഞ്ഞാല്പ്പിന്നെ ശര്ക്കരയും പൊടിയും വേര്തിരിച്ചെടുക്കുവാന് പറ്റില്ല. മധുരം മാത്രമേയുള്ളൂ. അതുപോലെ അദ്വൈതഭാവത്തില് എത്തിയാല്, ആ അനുഭൂതിതലത്തിലെത്തിയാല് അവരതായിത്തീരുകയാണ്. പിന്നെ അവരുടെ ലോകത്തില് രണ്ടില്ല. അവരുടെ വ്യവഹാരമെല്ലാം അദ്വൈതാനുഭവത്തിന്റെ വെളിച്ചത്തിലായിരിക്കും.
പൂര്ണജ്ഞാനികള് നീറ്റുകക്കപോലെയാണ്. കരിഞ്ഞ കയറുപോലെയാണ്. കാണുമ്പോള് അവയ്ക്കു രൂപമുണ്ട്. തൊട്ടാലതു നഷ്ടമാകും. കാഴ്ചയില് അവരുടെ പ്രവൃത്തികള് സാധാരണക്കാരുടെതുപോലെ തോന്നും. പക്ഷേ, അവര് സദാ ആത്മാവില്ത്തന്നെ രമിക്കുന്നു. അവര് ആത്മസ്വരൂപംതന്നെയാണ്.
