മനുഷ്യന് അര്ഹതപ്പെട്ട ജീവിതത്തെ നാം സ്വീകരിക്കാതെ വരുമ്പോള് ഹീനശക്തികള് നമ്മുടെ ജീവിതത്തിന്റെ നിയന്ത്രണം ഏറ്റെടുക്കുന്നു. നമ്മുടെ വ്യക്തിജീവിതത്തിലും കുടുംബത്തിലും സമൂഹത്തിലും കാണുന്ന വൈരുദ്ധ്യങ്ങളുടെ കാരണം ആസുരികശക്തികള് മനുഷ്യനില് ചെലുത്തുന്ന ഹീനസ്വാധീനമാണ്.
മനുഷ്യജീവിതത്തിന്റെ സമസ്തമേഖലകളിലും ഈ ശക്തികള് സ്വാധീനമുറപ്പിച്ച് ഭൂമിയെ അവരുടെ ചൊല്പ്പടിക്കാക്കാന് അശ്രാന്ത പരിശ്രമം നടത്തിക്കൊണ്ടിരിക്കുകയാണ്. ധര്മത്തിന്റെ ആവിര്ഭാവത്തിനും അതിന്റെ പുഷ്പീകരണത്തിനും വേണ്ടി സൃഷ്ടിക്കപ്പെട്ട ഈ ഭൂമി ആസുരികലോകമായി തീരേണ്ടതല്ല.
മനുഷ്യജീവിതം വഴിപിഴച്ചാല് ഭൂമിയെ ആസുരികശക്തികള് കീഴടക്കും. അതോടെ പ്രക്ഷുബ്ധമായ പ്രപഞ്ചശക്തികള് എല്ലാറ്റിനേയും നശിപ്പിച്ചുകളയുകയും ചെയ്യും. വര്ദ്ധിച്ചുവരുന്ന യുദ്ധങ്ങളും മഹാരോഗങ്ങളും പ്രകൃതിദുരന്തങ്ങളും നല്കുന്ന സൂചനകള് ഇതുതന്നെയാണ്.
ഈ പ്രതിസന്ധിഘട്ടത്തിന് പരിഹാരം കാണേണ്ടത് നാം തന്നെയാണ്. ധാര്മിക മൂല്യങ്ങളിലൂടെ ജീവിക്കുന്ന മനുഷ്യസമൂഹങ്ങള് ലോകത്തുടനീളം ഉയര്ന്ന് വരേണ്ടത് നമ്മുടെ അടിയന്തിരാവശ്യമാണ്.
