പാരീസ്: ലോകത്തെ ഞെട്ടിച്ച ഭീകരാക്രമണത്തിന് മുന്നിലും തളരാതെ ഫ്രഞ്ച് ആക്ഷേപഹാസ്യ വാരിക ഷാര്ലേ ഹെബ്ദോ വീണ്ടും പ്രസിദ്ദീകരണമാരംഭിച്ചു. ഫ്രാന്സിസ് മാര്പ്പാപ്പയെയും ഫ്രഞ്ച് നേതാവ് നിക്കൊളാസ് സാര്ക്കോസിയെയും ഉള്ക്കൊള്ളിച്ച് കൊണ്ടുള്ള കാര്ട്ടൂണുകളുമായി വാരികയുടെ 25 ലക്ഷം കോപ്പികള് ഇന്ന് പുറത്തിറങ്ങും. കൂടുതല് കടുത്ത വിമര്ശനവുമായി മുന്നോട്ട് പോകുമെന്ന് ഷാര്ലേ എബ്ദോ വ്യക്തമാക്കിക്കഴിഞ്ഞു.
ലോകത്തെ ഞെട്ടിച്ച ഭീകരാക്രമണത്തിന് ശേഷം വരയായും വാക്കുകളായും ലോകം നല്കിയ പിന്തുണയ്ക്ക് അര്ഹമായത് പകരം നല്കുകയാണ് ഷാര്ലേ ഹെബ്ദോ. ഞങ്ങള് വീണ്ടുമെത്തുന്നു എന്നാണ് പുതിയ പതിപ്പിന്റെ തലവാചകം. തോറ്റു മടങ്ങാതെ ഷാര്ലേ എബ്ദോ വീണ്ടും അച്ചടി മഷി പുരളുമ്പോള് പോപ്പ് ഫ്രാന്സിസ് മാര്പ്പാപ്പയെയും ഫ്രഞ്ച് രാഷ്ട്രീയ നേതാവ് നിക്കൊളാസ് സാര്ക്കോസിയെയും നായ്ക്കളുമായി ബന്ധിപ്പിച്ച് ആക്ഷേപഹാസ്യ രൂപത്തിലുള്ള കാര്ട്ടൂണുകളാണ് പുതിയ പതിപ്പിന്റെ കവര് പേജില് ഇടംപിടിച്ചിരിക്കുന്നത്.
പ്രവാചകന്റെ കാര്ട്ടൂണ് പ്രസിദ്ധീകരിച്ചതിന്റെ പേരില് ജനുവരി ഏഴിന് പാരിസിലെ ഷാര്ലേ എബ്ദോ ആസ്ഥാനത്ത് നടന്ന ആക്രമണത്തില് എഡിറ്റര് ഇന് ചീഫും, നാല് കാര്ട്ടൂണിസ്റ്റുകളുമടക്കം ഭീകരരുടെ തോക്കിന്മുനയിലൊടുങ്ങിയത് 12 പേരാണ്. അന്നു വെടിവയ്പ്പില് മരിച്ച തങ്ങളുടെ മാധ്യപ്രവര്ത്തകരുടെ സ്ഥാനങ്ങള് അതേപടി ഒഴിച്ചിട്ടു കൊണ്ടാണ് വാരിക പ്രസിദ്ധികരണം വീണ്ടുമാരംഭിക്കുന്നത്.
ആക്രമണം നടന്ന ഒരാഴ്ച്ചക്കകം നിലനില്പ്പിന്റെ പതിപ്പ് എന്ന പേരില് ഇടക്കാല പതിപ്പ് പുറത്തിറക്കിയ ഷാര്ലേ ഹെബ്ദോ അന്ന് 80 ലക്ഷത്തിലധികം കോപ്പികള് പുറത്തിറക്കി ചരിത്രം സൃഷ്ടിച്ചിരുന്നു. ഭയത്തിനും തോക്കുകള്ക്കും മുന്നില് നിശ്ശബ്ദരാകാന് ഒരുക്കമല്ലെന്ന് ലോകത്തോട് പ്രഖ്യാപിച്ചു കൊണ്ട് കൂടുതല് കടുത്ത വിമര്ശനങ്ങളുമായി വീണ്ടുമെത്തുകയാണ് ഷാര്ലേ എബ്ദോ.
