ആലുവ: കോണ്‍ഗ്രസ്സ് നേതാവിനും സഹോദരനുമെതിരെ 35 കോടി രൂപയുടെ അനധികൃത സ്വത്ത് സമ്പാദിച്ചുവെന്ന് പരാതിപ്പെട്ടയാളെ ഭീഷണിപ്പെടുത്തുന്നതായി പരാതി. എംഎല്‍എ ആയിരുന്ന കെ. മൂഹമ്മദാലിയും, സഹോദരന്മാരും ചേര്‍ന്ന് പരാതി നല്‍കുന്നവരെ ക്വട്ടേഷന്‍ സംഘത്തെ ഉപയോഗിച്ച് കൊല്ലുമെന്ന് നിരന്തരം ഭീഷണിപെടുത്തുന്നതായി ആന്റീകറപ്ഷന്‍ പീപ്പിള്‍സ് കൗണ്‍സില്‍ കളമശേരിമേഖല കണ്‍വീനര്‍ വി.എ. ഹംസ ആലുവ റൂറല്‍ പോലീസ് സൂപ്രണ്ടിന് പരാതി നല്‍കി
. കെ. പിസിസി ജോ ജനറല്‍ സെക്രട്ടറിയും, ആലുവ അര്‍ബന്‍ കോപ്പറേറ്റീവ് ബാങ്ക് ചെയര്‍മാനുമായ അബ്ദുള്‍ മുത്തലീഫ്, ഇദ്ദേഹത്തിന്റെ സഹോദരന്‍ ബി.എ കെയ്‌സ്, കൂടാതെ കണ്ടാലറിയാവുന്നവര്‍ എന്നിവര്‍ക്കെതിരേയാണ് പരാതി. വരവില്‍ കവിഞ്ഞ് സ്വത്ത് സമ്പാദിച്ചതുമായി ബന്ധപ്പെട്ട് ഉയര്‍ന്ന് വന്ന പരാതി ഒതുക്കുന്നതിന് വേണ്ടിയാണ് ഇത്തരമൊരു നീക്കമെന്ന് പരാതിയില്‍ ആരോപിക്കുന്നു.
വീക്ഷണം പത്രത്തിന്റെ പേരില്‍ വ്യാജ അക്കൗണ്ട് തുടങ്ങി കോടികള്‍തട്ടിച്ചെന്ന പരാതിയില്‍ തൃശൂര്‍ വിജിലന്‍സ് കോടതിയില്‍ കേസ് തുടരുന്നതിനിടെയാണ് ഭീഷണി എന്നത് ശ്രദ്ധേയമാണ്. പരാതി നല്‍കിയ ആന്റീകറപ്ഷന്‍ പീപ്പിള്‍സ് കൗണ്‍സില്‍ കളമശേരിമേഖല കണ്‍വീനര്‍ വി. എ. ഹംസക്കും കുടുംബത്തിനും എതിരെയാണ് ഭീഷണി.
ബസ്സ് കാത്ത് നിന്ന ഹംസയെ മുന്‍ എംഎല്‍എയുടെ അനുജന്‍ മുത്തലീഫ് മൃഗീയമായി അക്രമിച്ചതായും പരാതിയില്‍ പറയുന്നു. പരാതിക്കാരെ ഫോണില്‍ വിളിച്ച് ഭീഷണിപ്പെടുത്തുകയും, പ്രദേശത്ത് ഭീകരാന്തരീക്ഷം സൃഷ്ടിക്കുകയുമാണ് മുന്‍ എംഎല്‍എയുടെ സഹോദരനും മറ്റു ചിലരും ചെയ്യുന്നതെന്നും ഇവരില്‍നിന്ന് രക്ഷനല്‍കണമെന്നും പരാതിയില്‍ ആവശ്യപ്പെട്ടു.
അനധികൃത സ്വത്തായി രണ്ട് കാര്‍, രണ്ട് ബൈക്ക്, ഒരു കൈനറ്റിക്ക് ഹോണ്ട അഞ്ച് ആപ്പെ തുടങ്ങി 35 കോടി അറുപത് ലക്ഷം രൂപയുടെ അഴിമതിയാണ് ഇവരുടെ പേരില്‍ ആരോപിക്കപ്പെട്ടിട്ടുള്ളത്. 12 വര്‍ഷം കൊണ്ട് സമ്പാദിച്ചതാണ് ഇവ. കൂടാതെ അന്യ സംസ്ഥാനത്ത് 50 ഏക്കര്‍ സ്ഥലവും ഇദ്ദേഹം സ്വന്തമാക്കിയാതായും പരാതിയില്‍ പറയുന്നു.
