സുരബായ: ഇന്തോനേഷ്യയില് നിന്നു സിംഗപ്പുരിലേക്കുള്ള യാത്രയ്ക്കിടെ കാണാതായ എയര് ഏഷ്യാ വിമാനത്തിന്റെ നാല് വലിയ ഭാഗങ്ങള് കൂടി ജാവാ കടലില് കണ്ടെത്തിയതായി സൂചന. വെള്ളിയാഴ്ച അര്ദ്ധരാത്രിയോടെയാണു വിമാനഭാഗങ്ങള് കണ്ടെത്തിയത്.
ബോര്ണിയോ ദ്വീപിനു സമീപം 30 മീറ്റര് ആഴത്തില് നടത്തിയ തിരച്ചിലിലാണ് ഭാഗങ്ങള് കണ്ടെത്തിയതെന്നാണ് റിപ്പോര്ട്ട്. ലഭിച്ചതില് ഏറ്റവും വലിയ ഭാഗത്തിന് 10 മീറ്റര് നീളവും അഞ്ച് മീറ്റര് വീതിയുമുണ്ട്. രണ്ടാമത്തെ ഭാഗത്തിന് 7.2 മീറ്റര് വലുപ്പവും. ഇന്തോനേഷ്യന് നാവികസേനയുടെ കപ്പലാണ് ഈ ഭാഗങ്ങള് കണ്ടെത്തിയത്. വിമാനത്തിന്റെ വാല് ഭാഗമാണിതെന്നാണ് പ്രധമിക നിഗമനം. കണ്ടെത്തിയ ഭാഗങ്ങളുടെ ചിത്രമെടുക്കാന് കപ്പലില്നിന്നു തന്നെ പ്രവര്ത്തിപ്പിക്കുവാന് കഴിയുന്ന യന്ത്രത്തിനെ കടലിലേക്ക് അയച്ചിട്ടുണ്ട്.
60 കപ്പലുകളും എട്ട് വിമാനങ്ങളും നാല് ഹെലികോപ്റ്ററുകളുമാണ് ഇപ്പോള് തിരച്ചില് നടത്തുന്നത്. മുപ്പതുപേരുടെ മൃതദേഹങ്ങളാണ് ഇതുവരെ കണ്ടെടുത്തത്. വിമാനാവശിഷ്ടങ്ങള് കണ്ടെത്തിയ സമുദ്രഭാഗത്തിന്റെ അഞ്ചു ചതരുശ്ര കിലോമീറ്റര് ചുറ്റളവു കേന്ദ്രീകരിച്ചു കൂടുതല് മൃതദേഹങ്ങള്ക്കായി തെരച്ചില് തുടരുകയാണ്.
