70. കാലധാരിണീ: കാലത്തെ ധരിക്കുന്നവള്. നിര്വചിക്കാന് വിഷമമുള്ള ഒരു സങ്കല്പമാണു കാലം. ”കാലഃ കാലയതേഃ ഗതി കര്മണഃ (പോകുന്നതുകാലം) എന്ന് യാസ്കന്റെ പ്രസിദ്ധമായ നിര്വചനം. ‘കല സംഖ്യഅനേ’ (കണക്കാക്കാവുന്നതുകാലം). ‘കാലയതി ഭൂതാനി ഇതികാലഃ’ ( ജീവികളെ പിന്തുടരുന്നതിനാല് കാലം). ‘കലാം ലീയതേ ഇതികാലഃ’ (കലകളെ തമ്മില് ചേര്ക്കുന്നതു കാലം). ‘ കലക്ഷേപേ’ (പ്രേരിപ്പിക്കുന്നതു കാലം). എന്നിങ്ങനെ ആചാര്യന്മാര് പലതരത്തില് കാലത്തെ നിര്വചിക്കുന്നു. എല്ലാം ചേര്ത്ത് ‘കര്മ്മത്തിന്റെ തുടര്ച്ച’ എന്ന് നമുക്കു സ്വീകരിക്കാവുന്ന നിര്വചനം. സൃഷ്ടിസ്ഥിതിസംഹാരരൂപമായ പ്രപഞ്ച പ്രവര്ത്തനത്തിന്റെ തുടര്ച്ചയായ കാലത്തെ കൈയില് ധരിക്കുന്നതിനാല് കാലധാരിണി എന്നു മൂകാംബികാ ദേവിക്ക് പേര്.
ഏകാക്ഷരാ ഏകരൂപാ ഏഷണാരഹിതാദൃതാ
ഈശീത്രീ ഈശ്വരി ഈഡ്യാ ഈശ്വരോത്സംഗവാസിനീ
71. ഏകാക്ഷരാ: ഏകാക്ഷരമന്ത്രം രൂപമായവള്. എല്ലാ മന്ത്രങ്ങള്ക്കും ആധാരവും ബ്രഹ്മവാചിയും പ്രണവവുമായ ഓംകാരം ഏകാക്ഷരമെന്നു പ്രസിദ്ധം. ശാക്തേയതന്ത്രങ്ങള് ദേവീപ്രണവമെന്നു പ്രസിദ്ധമായ ഹ്രീംകാരത്തെ ഏകാക്ഷരമായി കണക്കാക്കുന്നു. ക്ലീംകാരമാണ് ഏകാക്ഷരമെന്നും അഭിപ്രായമുണ്ട്. എല്ലാ ഏകാക്ഷരമന്ത്രങ്ങളും സ്വരൂപമായവള് എന്നു നാമത്തെ വ്യാഖ്യാനിക്കാം.
72. ഏകരൂപാ: സര്വാധാരമായ ഒരേ ഒരു രൂപമുള്ളവള്. പരബ്രഹ്മസ്വരൂപിണി, പരാശക്തി.
73. ഏഷണാരഹിതാദൃതാ: ഏതിന്റെയെങ്കിലും നേര്ക്കുള്ള ആഗ്രഹമോ ആസക്തിയോ ആണ് ഏഷണ. അനേകമനേകം ഏഷണകളുടെ ഭാരവും പേറിയാണു മനുഷ്യര് ജീവിക്കുന്നത്. സംസാരബന്ധം ഉപേക്ഷിച്ച യോഗിമാര് മാത്രമാണ് ഏഷണാരഹിതര്. ആത്മസാക്ഷാത്കാരം നേടിയ യോഗിമാരുടെ മനസ്സില് പ്രകാശിക്കുന്ന ദേവീചൈതന്യമാണ് അവരെ ഏഷണകളില്നിന്നു രക്ഷിക്കുന്നത്. അങ്ങനെയുള്ള യോഗിമാരാല് ആദരിക്കപ്പെടുന്നവള്. ആരാധിക്കപ്പെടുന്നവള് എന്നു താത്പര്യം.
74. ഈശീത്രീ: എല്ലാത്തിനും നാഥയായവള്, സര്വേശ്വരി.
75. ഈശ്വരീ: എല്ലാത്തിനും ഈശ്വരനായ ശ്രീപരമേശ്വരന്റെ പത്നി. ഈശ്വരന്മാരായ ബ്രഹ്മാവിന്റെയും വിഷ്ണുവിന്റെയും ശ്രീപരമേശ്വരന്റെയും പത്നിമാരായ മഹാസരസ്വതിയുടെയും മഹാലക്ഷ്മിയുടെയും ശ്രീപാര്വതിയുടെയും ഏകീഭവിച്ചരൂപമാണു മൂകാംബികാദേവി. പരബ്രഹ്മമഹിഷിയായ പരാശക്തി എന്നു വ്യാഖ്യാനിക്കാം. മുന് നാമത്തിന്റെ പര്യായമായി സ്വീകരിക്കാം.
76. ഈഡ്യാ: സ്തുതിക്കപ്പെടേണ്ടവള്, സ്തുതി അര്ഹിക്കുന്നവള്. സകലലോകങ്ങളെയും സൃഷ്ടിക്കുകയും സംരക്ഷിക്കുകയും ചെയ്യുന്ന മഹാദേവിയേക്കാള് സ്തുത്യര്ഹമായ മറ്റൊരു ശക്തിയില്ല.
77. ഈശ്വരോത്സംഗവാസിനീ: ഒരിക്കലും പിരിയാത്ത ജായാപതിമാരാണു പാര്വതീ പരമേശ്വരര്. പ്രേമാധിക്യംകൊണ്ട് ദേവി സദാ പരമേശ്വരന്റെ മടിയില്ത്തന്നെയാണിരിക്കുന്നതെന്ന് ആലങ്കാരികപ്രസ്താവന.
… തുടരും
