66. കമലാഃ – ലക്ഷ്മീദേവി. കമലം കൈയ്യിലുള്ളതുകൊണ്ടും കമലത്തില് വസിക്കുന്നവളായതുകൊണ്ടും ലക്ഷ്മീദേവിക്കു ‘കമലാ’ എന്നു പേര്. എല്ലാവരാലും ആഗ്രഹിക്കപ്പെടുന്നവള് എന്ന് കമലാ എന്ന പദത്തിന്റെ നിഷ്പത്തി. മൂകാംബികയുടെ കമലാരൂപത്തെ ഇച്ഛിക്കാത്തവരായി ആരും തന്നെയില്ല.
67. കാളികാഃ – കാളീദേവി. മഹാകാളീ എന്ന 10-ാം നാമത്തിന്റെ വ്യാഖ്യാനം നോക്കുക.
68. കാമ്യാഃ – ആഗ്രഹിക്കപ്പെടേണ്ടവള്. മനുഷ്യജീവിതം പലതരത്തിലുള്ള താപങ്ങള്കൊണ്ടു ദഹിപ്പിക്കുന്നതാണ്. എല്ലാ താപങ്ങളില് നിന്നു ഭക്തരെ മോചിപ്പിക്കുന്ന കരുണാമയിയായ മൂകാംബിക ഏവര്ക്കും കാമ്യയാണ്.
69. കാമാക്ഷീഃ – കാമങ്ങളായ (കമനീയങ്ങളായ) അക്ഷികള് (കണ്ണുകള്) ഉള്ളവള്. ‘കാ’ എന്ന ഏകാക്ഷരപദം സരസ്വതിയെയും ‘മാ’ എന്ന പദം ലക്ഷ്മിയെയും കുറിക്കുന്നു. ആദിശക്തിയായ ലളിതാദേവി വലതുകണ്ണുകൊണ്ടു ബ്രഹ്മാവിനെയും ഇടതുകണ്ണുകൊണ്ടു വിഷ്ണുവിനെയും നോക്കിയെന്നും ദേവിയുടെ ആ നോട്ടത്തില്നിന്ന് പ്രഭാപൂഞ്ജരമദ്ധ്യസ്ഥരായി സരസ്വതിയും ലക്ഷ്മിയും ഉഭ്ദവിച്ചുവെന്നും അപ്പോള് മുതല് മഹാദേവിക്കു കാമാക്ഷീ എന്നു പേരുണ്ടായി എന്നും ലളിതോപഖ്യാനം.
രതീദേവിയുടെ വിധവാവേഷം കണ്ടു മനസ്സലിഞ്ഞ ദേവി കാമേശ്വരനെ നോക്കി എന്നും ആ നോട്ടത്തില്നിന്നു കാമദേവന് വീണ്ടും ജനിച്ചുവെന്നും ലളിതോപാഖ്യാനം. കാമദേവനു ജന്മം കൊടുത്ത കണ്ണുള്ളവളാകയാല് ദേവിക്കു കാമാക്ഷീ എന്നു പേരുണ്ടായി എന്നും ലളിതോപഖ്യാനം.
ഭക്തര്ക്കു കാമങ്ങള് ദാനം ചെയ്യുന്ന കണ്ണുള്ളവളാകയാല് കാമാക്ഷി എന്നു മൂകാംബികാദേവിക്കു പേരുണ്ടായി എന്നും വ്യാഖ്യാനം.
കാഞ്ചീപുരം ക്ഷേത്രത്തിന്റെ അധിഷ്ഠാത്രിയായ ദേവിയുടെ പേര് കാമാക്ഷീ എന്നാണ്. ”കാഞ്ചിയില് കാമാക്ഷി മധുരയില് മീനാക്ഷീ” എന്ന ചൊല്ല് പ്രസിദ്ധമാണ്.
….. തുടരും
