1. താലിബാന് വെടിവച്ച്കൊന്ന കുട്ടിയുടെ മൃതദേഹത്തിനരികില് പൊട്ടികരയുന്ന ബന്ധുക്കള് 2. കൊല്ലപ്പെട്ട കുട്ടികള്ക്ക് പെഷവാറില് വിദ്യാര്ഥികള് ആദരാഞ്ജലി അര്പ്പിക്കുന്നു
പെഷവാര്: മരണത്തെ ഞാന് അടുത്തു കണ്ടു. ടീച്ചര് പഠിപ്പിച്ചു കൊണ്ടിരിക്കുമ്പോഴാണ് വെടിയൊച്ച കേട്ടത്, പുകയുയര്ന്നു, ക്ലാസ് മുറികളിലേക്ക് തോക്കുമായി അവര് ഓടിവന്നു, ഏങ്ങലടിച്ചും പേടിമാറാതെയും അവന് പറഞ്ഞു.
എന്റെ ടീച്ചര് കരയുകയായിരുന്നു. അവരുടെ കൈയ്ക്ക് വെടിയേറ്റിരുന്നു. വേദനകൊണ്ട് അവര് തറയില് കിടന്ന് പുളഞ്ഞു. അപ്പോള് ഒരു ഭീകരര് ഓടിവന്ന് തോക്കെടുത്ത് ടീച്ചര്ക്കുനേരെ തുരുതുരാ വെടിയുതിര്ത്തു. കരച്ചിലിന്റെ ശബ്ദം നിലയ്ക്കും വരെ അയാള് ടീച്ചറെ വെടിവച്ചു, ഇരുകാലുകള്ക്കും വെടിയേറ്റ് ആശുപത്രിയില് കഴിയുന്ന പതിനഞ്ചുവയസുകാരനായ ഷാരൂഖ് ഖാന് സംഭവം വിവരിച്ചു.
സ്കൂളിന്റെ ക്ലാസ് മുറികളില്, ഹാളുകളില്, ഇടനാഴികളില്.. എങ്ങും മൃതദേഹങ്ങളായിരുന്നുവെന്ന് ദൃക്സാക്ഷികള് പറഞ്ഞു. ക്ലാസ് മുറികളില് തോക്കുധാരികെളക്കെണ്ട് ബഞ്ചുകള്ക്കും ഡസ്ക്കുകള്ക്കും മേശകള്ക്കും കീഴെ ഒളിച്ച കുട്ടികളെ ഭീകരര് തിരഞ്ഞുപിടിച്ച് വെടിവച്ചുകൊന്നു.
അകത്തു നിന്ന് അടച്ചിട്ട മുറി തകര്ത്താണ് അവര് കടന്നത്. ആ സമയം നൂറ്റമ്പതോളം കുട്ടികള് ക്ലാസില് ഉണ്ടായിരുന്നു. അവര് എന്റെ സഹപാഠികളില് മിക്കവരെയും വധിച്ചു. എന്നെ ആശുപത്രിയില് ആക്കിയതിനാല് എന്താണ് അവിടെ നടന്നതെന്ന് പൂര്ണ്ണമായും അറിയില്ല, ഖാന് തുടര്ന്നു.
അവര് മടങ്ങിവരും. എന്നെക്കൊല്ലും എന്ന് പറഞ്ഞ് ഭയന്ന് കരയുകയാണ് അവന്. വെടിവെയ്പ്പില് പരിക്കേറ്റ് ആശുപത്രിയില് കഴിയുന്ന ഒന്പതുവയസുകാരന്റെ അച്ഛന് മുഷ്താഖ് അഹമ്മദ് പറഞ്ഞു.
ഭീകരരുടെ സംഘത്തില് കുറഞ്ഞത് മൂന്ന് ചാവേറുകളെങ്കിലും ഉണ്ടായിരുന്നു. ചാവേറുകള് ബോംബുകള് പൊട്ടിച്ചാണ് അനവധി കുട്ടികളെ കൊന്നത്. അതിനാല് മരിച്ചുവീണ പലകുട്ടികളുടേയും മുഖങ്ങള് തിരിച്ചറിയാന് കഴിയാത്തവിധം കത്തിക്കരിഞ്ഞിരുന്നു.
പെഷവാറിലെ കൂട്ടക്കുരുതിയില് ലോകം ഞെട്ടിത്തരിച്ചു നില്ക്കുകയാണ്.
