ന്യൂദല്ഹി: രാജ്യത്ത് റെയില്വേ ട്രാക്കില് മരിക്കുന്നവരുടെ എണ്ണം വര്ദ്ധിച്ചുവരുന്നതായി റിപ്പോര്ട്ട്. നാഷണല് ട്രാന്സ്പോര്ട്ടറിന്റെ സുരക്ഷാവിഭാഗം നടത്തിയ കണക്കെടുപ്പിലാണ് ഇത്തരത്തില് രേഖപ്പെടുത്തിയിരിക്കുന്നത്. മുന്വര്ഷങ്ങളെ അപേക്ഷിച്ച് 2014ല് റെയില്വേ ട്രാക്കില് മരിക്കുന്നവരുടെ എണ്ണം വര്ധിച്ചതായാണ് കണക്കുകള് സൂചിപ്പിക്കുന്നത്. 18735 പേരാണ് ഇത്തരത്തില് മരണമടഞ്ഞത്.
2011ല് ഇത് 14973 ആയിരുന്നു രേഖപ്പെടുത്തിയിരുന്നത്. 2012ല് 16336 ഉം, 2013ല് ഇത് 19997 ആയും വര്ധിച്ചിരുന്നു. ഈവര്ഷം ഒക്ടോബറിനുള്ളില് മരിച്ചവരെയാണ് സുരക്ഷാ വിഭാഗം കണക്കെടുപ്പില് ഉള്പ്പെടുത്തിയിരിക്കുന്നത്. ഇവയില് ഭൂരിഭാഗവും റെയിവേ ട്രാക്ക് മുറിച്ചു കടക്കുന്നതിനിടയില് മരണപ്പെടുന്നവരാണ്. ട്രെയിന് പാളംതെറ്റിയും അപകടം, ആത്മഹത്യ എന്നിങ്ങനെ മരണപ്പെടുന്നവരേയും കണക്കില് ഉള്പ്പെടുത്തിയിട്ടുണ്ട്.
റെയില്വേ ട്രാക്കിലെ മരണം വര്ധിച്ചുവരുന്ന സാഹചര്യത്തില് ജനങ്ങളുടെ സുരക്ഷ വര്ധിപ്പിക്കാനും റെയില്വേ അധികൃതര് പദ്ധതിയിടുന്നുണ്ട്. ഇതിന്റെ ഭാഗമായി പൊതുജനങ്ങള്ക്കിടയില് അവബോധം ഉണ്ടാക്കുന്നതിനായി നിരവധി ക്ലാസുകളും സംഘടിപ്പിക്കുന്നുണ്ട്. കൂടാതെ ലെവല്ക്രോസുകള് മുറിച്ചുകടക്കുമ്പോള് എടുക്കേണ്ട മുന്കരുതലുകള് സംബന്ധിച്ചും മുന്നറിയിപ്പ് നല്കുന്നുണ്ട്.
നിലവില് സുരക്ഷാ ഉദ്യോഗസ്ഥരില്ലാത്തെ 11563 ലെവല് ക്രോസ്സുകളാണ് റെയില്വേക്കുള്ളത്. അതേസമയം, റെയില്വേയുടെ ഉടമസ്ഥതയിലുള്ള സ്ഥലത്ത് പൊതുജനങ്ങള് അനധികൃതമായി പ്രവേശിക്കുന്നത് സെക്ഷന് 147 റെയില്വേ ആക്ട് പ്രകാരം കുറ്റകരമാണെന്നും റെയില്വേ അധികൃതര് അറിയിച്ചു. ആളില്ലാ ലെവല് ക്രോസുകളിലൂടെയുള്ള ഗതാഗതം നിരോധിക്കാനും റെയില്വേ അധികൃതര് നടപടി സ്വീകരിക്കുന്നുണ്ട്. പകരം ഈ സ്ഥലങ്ങളില് ഓവര് ബ്രിഡ്ജുകളും അണ്ടര് ബ്രിഡ്ജുകളും സ്ഥാപിക്കാനാണ് അധികൃതര് തീരുമാനിച്ചിരിക്കുന്നത്.
