ആംസ്റ്റര്ഡാം: തുടര്ച്ചയായ രണ്ട് പരാജയങ്ങള്ക്കുശേഷം ഡച്ച് പോരാളികളുടെ തകര്പ്പന് കുതിപ്പ്. ഇന്നലെ യൂറോ 2016 യോഗ്യതാ റൗണ്ടിലാണ് ആറ് ഗോള് വിജയവുമായി ഹോളണ്ട് വിജയവഴിയില് തിരിച്ചെത്തിയത്. ഗ്രൂപ്പ് എയില് നടന്ന പോരാട്ടത്തില് ലാത്വിയയാണ് ഹോളണ്ട് തേരോട്ടത്തില് നിലംപരിശായത്. അതേസമയം ഇറ്റലി ക്രൊയേഷ്യയുമായി സമനില വഴങ്ങി. കളി ക്രൊയേഷ്യന് ആരാധകരുടെ അതിക്രമത്തെ തുടര്ന്ന് കളി രണ്ടു തവണ തടസ്സപ്പെടുകയും ചെയ്തു.
ഗ്രൂപ്പ് എയില് ലാത്വിയക്കെതിരെ നടന്നപോരാട്ടത്തില് ഡച്ച് പോരാളികളുടെ സമ്പൂര്ണ്ണ ആധിപത്യമായിരുന്നു പ്രകടമായത്. ആര്യന് റോബന്റെയും യാന് ക്ലാസ് ഹണ്ട്ലറുടെയും ഇരട്ടഗോളുകളാണ് ഹോളണ്ടിന് കളിയില് മിന്നുന്ന വിജയം സമ്മാനിച്ചത്. യോഗ്യതാ റൗണ്ടില് നാല് മത്സരങ്ങള് പൂര്ത്തിയാക്കിയ ഹോളണ്ട് രണ്ടാം വിജയമാണ് ഇന്നലെ സ്വന്തമാക്കിയത്. കഴിഞ്ഞയാഴ്ച സൗഹൃദ മത്സരത്തില് മെക്സിക്കോയോടും കഴിഞ്ഞ മാസം നടന്ന യോഗ്യതാ റൗണ്ടില് ഐസ്ലന്റിനോടും പരാജയപ്പെട്ട ഹോളണ്ടിന്റെ തകര്പ്പന് തിരിച്ചുവരവിനാണ് ആംസ്റ്റര്ഡാം അരീന സാക്ഷ്യം ഹിച്ചത്.
ആറാം മിനിറ്റില് സൂപ്പര്താരം റോബിന് വാന് പെഴ്സിയാണ് ഡച്ച് ഗോള്മഴക്ക് തുടക്കമിട്ടത്. പിന്നീട് 35, 82 മിനിറ്റുകളില് ആര്യന് റോബനും 42, 89 മിനിറ്റുകളില് ക്ലാസ് ഹണ്ട്ലറും 78-ാം മിനിറ്റില് ജെഫ്രി ബുര്മയും ഹോളണ്ടിനായി ഗോളുകള് നേടി. ഗ്രൂപ്പിലെ മറ്റ് മത്സരങ്ങളില് ചെക്ക് റിപ്പബ്ലിക്ക് തുടര്ച്ചയായ മൂന്നാം വിജയം നേടി. ഐസ്ലന്റിനെ ഒന്നിനെതിരെ രണ്ട് ഗോളുകള്ക്ക് അവര് കീഴടക്കി. മറ്റൊരു മത്സരത്തില് തുര്ക്കി 3-1ന് കസാക്കിസ്ഥാനെയും കീഴടക്കി. നാല് മത്സരങ്ങള് പൂര്ത്തിയായ ഗ്രൂപ്പില് 12 പോയിന്റുമായി ചെക്ക് റിപ്പബ്ലിക്ക് ഒന്നാമതാണ്. 9 പോയിന്റുള്ള ഐസ്ലന്റ് രണ്ടും 6 പോയിന്റുമായി ഹോളണ്ട് മൂന്നാം സ്ഥാനത്തും നില്ക്കുന്നു.
ഗ്രൂപ്പ് ബിയില് നടന്ന പോരാട്ടത്തില് ഇസ്രയേലും സൈപ്രസും മികച്ച വിജയം സ്വന്തമാക്കിയപ്പോള് ബെല്ജിയം സമനിലകൊണ്ട് തൃപ്തരായി. ഇസ്രയേല് മറുപടിയില്ലാത്ത മൂന്ന് ഗോളുകള്ക്ക് ബോസ്നിയ-ഹെര്സഗോവിനയെയും സൈപ്രസ് 5-0ന് അന്ഡോറയെയും കീഴടക്കി. വെയ്ല്സാണ് കരുത്തരായ ബല്ജിയത്തെ ഗോള്രഹിത സമനിയില് തളച്ചത്. കളിച്ച മൂന്ന് മത്സരങ്ങളും ജയിച്ച് ഒമ്പത് പോയിന്റുമായി ഇസ്രയേലാണ് ഗ്രൂപ്പില് മുന്നില്. നാല് മത്സരങ്ങളില് നിന്ന് 8 പോയിന്റുള്ള വെയ്ല്സ് 6 പോയിന്റുള്ള സൈപ്രസ് എന്നിവര് രണ്ടും മൂന്നും സ്ഥാനങ്ങളില് നില്ക്കുന്നു.
ഗ്രൂപ്പ് എച്ചില് ഇറ്റലി-ക്രൊയേഷ്യ പോരാട്ടത്തിനിടെ സംഘര്ഷഭരിതമായ രംഗങ്ങള് അരങ്ങേറി. ക്രൊയേഷ്യന് ആരാധകര് കളിക്കളത്തിലേക്ക് തീപ്പന്തങ്ങള് എറിഞ്ഞതിനെ തുടര്ന്ന് രണ്ട് തവണ മത്സരം നിര്ത്തിവെക്കേണ്ടിവന്നു. ഒടുവില് പോലീസ് ഇടപെട്ട് രംഗം ശാന്തമാക്കിയശേഷമാണ് കളി നടന്നത്. മത്സരം ഓരോ ഗോളടിച്ച് സമനിലയില് പിരിയുകയും ചെയ്തു. ഇറ്റലിക്ക് വേണ്ടി അന്റോണിയോ കാന്ഡ്രിവയും ക്രൊയേഷ്യക്ക് വേണ്ടി ഇവാന് പെരിസിച്ചും ഗോളുകള് നേടി. ഗ്രൂപ്പിലെ മറ്റ് മത്സരങ്ങളില് നോര്വേ 1-0ന് അസര്ബെയ്ജാനെ പരാജയപ്പെടുത്തിയപ്പോള് ബള്ഗേറിയ-മാള്ട്ട പോരാട്ടം 1-1ന് സമനിലയില് കലാശിച്ചു. നാല് മത്സരങ്ങളില് നിന്ന് 10 പോയിന്റുമായി ക്രൊയേഷ്യയും ഇറ്റലിയുമാണ് ഗ്രൂപ്പില് ഒന്നും രണ്ടും സ്ഥാനത്ത്.
