968. വല്ഗുഹാസഃ – മനോഹരമായി ചിരിക്കുന്നവന്. മുന്നാമത്തിന്റെ വ്യാഖ്യാനത്തില് ഉദ്ധരിച്ച നാരായണീയ ശ്ലോകത്തില് ഭഗവാന്റെ ഹാസത്തെ ‘ ആര്ദ്രഹസിതം’ എന്നാണ് പറയുന്നത്. നാരായണീയം 100-ാം ദശകത്തില് ഭഗവാനെ മുന്നില് കണ്ടുകൊണ്ടെഴുതിയ 4-ാം ശ്ലോകത്തില് ”പ്രീതി പ്രസ്യന്ദി മന്ദസ്മിതി മധൂരതര വക്ത്രം എന്നാണെഴുതിയത്.
പലരും പലതരത്തിലാണു ഭഗവാനെ കാണുന്നതെങ്കിലും ഭഗവാന്റെ വല്ഗുവായ ഹാസം മൂന്നുലോകങ്ങളെയും മയക്കുന്നതായാണ് എല്ലാവരും കരുതുന്നത്. മഹാലക്ഷ്മി ആവല്ഗുഹാസത്താല് ആകൃഷ്ടയായിത്തീര്ന്നതുകൊണ്ട് സ്വന്തം ഭക്തരെപ്പോലും മറന്നുപോകാറുണ്ട്.
968. വല്ലവീവല്ലഭഃ – ഗോപസ്ത്രീകള്ക്കു പ്രിയപ്പെട്ടവന്. കൃഷ്ണാവതാരത്തില് ഭഗവാന്റെ ബാല്യവും കൗമാരവും ഗോപാലന്മാര്ക്കൊപ്പമായിരുന്നു. ശൈവത്തില് എല്ലാ ഗോപസ്ത്രീകള്ക്കും ഭഗവാനെ ഇഷ്ടമായിരുന്നു. മേഘവര്ണ്ണനായ ശിശുവിനെ കൈയിലെടുത്തു താലോലിക്കാന് തിരക്കുകൂട്ടുന്ന ഗോപസ്ത്രീകളുടെ താമരപ്പുപോലെ അഴകാര്ന്ന കൈകളില് മാറിമാറിക്കളിക്കുന്ന ശിശുവിനെ താമരപ്പൂക്കളില് ചുറ്റിപറന്ന് ഓരോന്നിലും മാറിമാറിയെത്തുന്ന കാര്വണ്ടിനോട് നാരായണീയകാരന് ഉപമിക്കുന്നുണ്ട്. വല്ലഭന് എന്ന പദത്തിനു സഞ്ചരിക്കുന്നവന് എന്നര്ത്ഥമുണ്ട്. ആ അര്ത്ഥത്തില് ശിശുവായ ഭഗവാന് വല്ലകീവല്ലഭനാണ്.
കൗമാരമായപ്പോള് ഗോപാലയുവതികളില് പലരും ഭഗവാനെ കാമുകനായി സങ്കല്പിച്ചു തുടങ്ങി. ചിലര് ഭര്ത്താവായിത്തന്നെ കരുതി. ഇങ്ങനെ എല്ലാ വല്ലവിമാര്ക്കും ഭഗവാന് പലതരത്തില് വല്ലഭനായി.
970. വശീഃ – വശത്താക്കിയവന്, സ്വാധീനത്തിലാക്കിയവന്. കുട്ടിക്കാലത്ത് ഗോപസ്ത്രീകളെ വശത്താക്കിയ ഭഗവാന് വളര്ന്നപ്പോള് ലോകത്തെയാകെ വശത്താക്കി. ഭഗവാന്റെ കൃഷ്ണാവതാരം ദ്വാപരയുഗത്തിലായിരുന്നു. യുഗസംക്രമം കഴിഞ്ഞ് കലിയുഗമായെങ്കിലും ലോകം ഇപ്പോഴും ഭഗവാന്റെ സ്വാധീനത്തിലാണ്.
വശീ എന്ന പദത്തിന്റെ ഏറ്റവും പ്രചാരത്തിലുള്ള അര്ത്ഥം ഇന്ദ്രിയങ്ങളെ സ്വാധീനത്തിലാക്കിയ യോഗിമാര് പലരുണ്ടാകാം. പൂര്ണമായി ഇന്ദ്രിയങ്ങളെ വശത്താക്കിയ യോഗേശ്വരന് ശ്രീകൃഷ്ണന് മാത്രമേയുള്ളൂ. ഭഗവാന് തന്നെ വശിയെ നിര്വചിക്കുന്നത് ”സര്വകര്മ്മാണി മനസാ സന്ന്യാസ്യാസ്തേ സുഖം വശീ
നവദ്വാരേ പുരേ ദേഹീ നൈവകുര്വന് ന കാരയന്” (ഇന്ദ്രിയങ്ങളെ വശത്താക്കിയ ദേഹി എല്ലാ കര്മ്മങ്ങളെയും മനസ്സുകൊണ്ടുപേക്ഷിച്ച് ഒന്പതു വാതിലുകളുള്ള ശരീരമാകുന്ന പുരത്തില് ഒന്നും ചെയ്യാതെയും ഒന്നും ചെയ്യിക്കാതെയും സുഖമായി സ്ഥിതിചെയ്യുന്നു. ഭഗവദ്ഗീത 5-13) . പ്രപഞ്ചമാകുന്നു ശരീരത്തില് വശിയായ ദേഹിയായി പ്രപഞ്ച പ്രവര്ത്തനത്തിനു സാക്ഷിയായി യോഗിയായി സ്ഥിതിചെയ്യുന്ന ഭഗവാനാണ് യഥാര്ത്ഥ വശി.
വശി എന്ന പദത്തിനു ഭരണാധികാരി എന്നും അര്ത്ഥമുണ്ട്. ഇന്ദ്രിയങ്ങളെ ആത്മാവു വശത്താക്കുന്നതുപോലെ തന്റെ ഭരണത്തിന്കീഴിലുള്ള രാജ്യത്തിന്റെ എല്ലാ അംഗങ്ങളെയും പൂര്ണമായി സ്വാധീനത്തിലാക്കുന്നവനാണ് വശിയായ ഭരണാധിപന്. ബ്രഹ്മാണ്ഡകോടികളുള്പ്പെട്ട പ്രപഞ്ചമെന്ന മഹാ സാമ്രാജ്യത്തിന്റെ എല്ലാ ഘടകശക്തികളെയും നിയന്ത്രിക്കുന്നു ഗുരുവായൂരപ്പന് ആ അര്ത്ഥത്തിലും വശിയാണ
(തുടരും).
