എന്തുകൊണ്ടാണ് വലതുവശം ചരിഞ്ഞുകിടക്കണമെന്ന് പറയുന്നത്? വലതുവശവും, ഇടതുവശവും തമ്മില് എന്താണ് വ്യത്യാസം? ഈ ചോദ്യം ആഴമുള്ളതാണ്. നമ്മുടെ ഇടതുവശം തണുപ്പും, കുളിര്മ്മയും തരുന്നതും, വലതുവശം കൂടുതല് ഊര്ജ്ജം തരുന്നതുമാണ്. നിങ്ങള് ഇടതുവശത്തേക്കു ചരിഞ്ഞുകിടക്കുമ്പോള് വയറ് താഴെയാണ്.
ഭക്ഷണം താഴെയാണ്. അതിനാല് വിശ്രമം ലഭിക്കുന്നു. വലതുവശത്തേക്ക് ചരിഞ്ഞുകിടക്കുമ്പോള്, ഭക്ഷണം മുകളിലേക്കുയരുന്നു. അതുകൊണ്ട് ഉറങ്ങുമ്പോള് ഇടതുവശം ചരിഞ്ഞുകിടക്കുന്നതാണ് ഉത്തമം. അപ്പോള് നിങ്ങളുടെ നാസികയുടെ വലത്തേ ദ്വാരമാണ് പ്രവര്ത്തിക്കുക. അതിനാല് ശരീരത്തില് മെറ്റാബോളിസം (ആഹാരം ദഹിപ്പിക്കുന്നതിനും അതിനെ പ്രവൃത്തി ചെയ്യുന്നതിനാവശ്യമായ ഊര്ജ്ജമാക്കി മാറ്റുന്നതിനുമായി ശരീരത്തില് നടക്കുന്ന രാസപ്രവര്ത്തനങ്ങള്) സാധാരണ നിരക്കിനേക്കാള് 50ശതമാനം വര്ദ്ധിക്കുന്നു.
അതായത്, മെറ്റാബോളിസത്തിന്റെ സാധാരണ നിരക്ക് 100 യൂണിറ്റാണെങ്കില്, ഇടതുവശത്തേക്ക് ചരിഞ്ഞുകിടക്കുമ്പോള് അത് 150 യൂണിറ്റായി വര്ദ്ധിക്കും. വലതുവശത്തേക്കാണ് ചരിഞ്ഞുകിടക്കുന്നതെങ്കില് ഇടത്തേ നാസാദ്വാരമാണ് പ്രവര്ത്തിക്കുക. അപ്പോള് മെറ്റാബോളിസിം 50 ശതമാനം കുറയും. അത് നിങ്ങള്ക്ക് കൂടുതല് ശാന്തിയും, സമാധാനവും പകരുന്നു. എഴുന്നേല്ക്കുമ്പോള്, സംഘര്ഷങ്ങളില്നിന്ന് മോചനവും, വിശ്രമവും, പൂര്ണതയും നിങ്ങള്ക്കനുഭവപ്പെടുന്നു.
അതിനാല് ഉറങ്ങുമ്പോള് ഇടതുവശത്തേക്ക് ചരിഞ്ഞും, ധ്യാനത്തിനും ക്രിയക്കും ശേഷം വലതുവശത്തേക്കു ചരിഞ്ഞും കിടക്കുന്നതാണ് നല്ലത്. ഇടതുവശം വിശ്രമവും, വലതുവശം പ്രവര്ത്തനക്ഷമതയും തരുന്നു.
