927. പൃഥഗ്രൂപഃ – വേറെ വേറെ രൂപങ്ങളുള്ളവന്. ഏകനും അവിഭക്തനുമായ ഭഗവാന് സ്വയം വിഭക്തനായപ്പോള് അനേകം ദേശങ്ങളും ദേശവിഭാഗങ്ങളും അനേകമനേകം ജീവിവര്ഗ്ഗങ്ങളും വസ്തുസമൂഹങ്ങളും ഉണ്ടായി. ഓരോ സമൂഹത്തിലും നിരവധി അംഗങ്ങളുണ്ടായി. ഓരോന്നിന്റെയും ഘടന സാമാന്യമായ ലക്ഷണങ്ങളുള്ളവയെങ്കിലും വ്യത്യസ്തമാണ്. ഉദാഹരണമായി ഒരുകൂട്ടം ഉറുമ്പുകളെ പരിശോധിച്ചാല് എല്ലാ അംശത്തിലും തുല്യതയുള്ള രണ്ടെണ്ണത്തിനെ കണ്ടെത്താന് കഴിയുകയില്ല.
ഈ ഭൂമിയില് ജീവിക്കുന്നത് എത്ര മനുഷ്യവര്ഗ്ഗങ്ങളാണ്. വെളുത്തവരും കറുത്തവരും മഞ്ഞനിറമുള്ളവരും പൊക്കമുള്ളവരും കുറിയവരും മറ്റും മറ്റുമായി അനേകവര്ഗ്ഗങ്ങള്. ഇവരില് ആരെ കണ്ടാലും ഒറ്റനോട്ടത്തില് മനുഷ്യരെന്നു തിരിച്ചറിയാം. അത്രയ്ക്കുണ്ട് മനുഷ്യരുടെ സമാനതകള്. ശതകോടിക്കണക്കിന് അംഗങ്ങളുള്ള ഈ മനുഷ്യവര്ഗ്ഗത്തില് എല്ലാ അംശത്തിലും തുല്യരായ രണ്ടു മനുഷ്യരില്ല. ഒരേ ഇനത്തില്പ്പെട്ട സസ്യങ്ങളില് ഒരു വ്യത്യാസവുമില്ലാത്ത രണ്ടെണ്ണത്തെ കണ്ടെത്താനാവില്ല. പൃഥഗ്രൂപനായ ഭഗവാന്റെ ഓരോ രൂപവും അന്യാദൃശമാണ്.
928. മഹേശ്വരഃ – മഹാനായ ഈശ്വരന്. മറ്റീശ്വരന്മാരെക്കാള് മഹത്ത്വമുള്ളവന്. മഹാവിഷ്ണുവിന്റെ അനേകമവതാരങ്ങളില് ഏറ്റവും മഹത്വമുള്ളത് കൃഷ്ണാവതാരമായതുകൊണ്ട് ശ്രീകൃഷ്ണനാണു മഹേശ്വരന് എന്നു ചില ആചാര്യന്മാര് അഭിപ്രായപ്പെടുന്നു.
ത്രിമൂര്ത്തികളില് മഹത്ത്വം കൂടുതല് വിഷ്ണുവിനാകയാല് വിഷ്ണുവാണു മഹേശ്വരന് എന്നും വാദമുണ്ട്. ശിവ പര്യായമായാണ് മഹേശ്വരന് എന്ന പദം സദാശിവാദികളായ എല്ലാ ദേവന്മാര്ക്കും ജന്മദാതാവായ ബ്രഹ്മചൈതന്യത്തെ ഈ നാമം കുറിക്കുന്നതായി വ്യാഖ്യാനിക്കുന്നതുചിത്രം. ബ്രഹ്മമെന്നോ പരബ്രഹ്മമെന്നൊ പരമാത്മാവെന്നോ ചില പദങ്ങള് പറയാമെന്നല്ലാതെ മഹേശ്വര ശബ്ദത്തെ വ്യാഖ്യാനിക്കാന് ഭാഷയ്ക്ക് കഴിവില്ല.
(തുടരും)
