യൂറോപ്പ ലീഗ്: ടോട്ടനത്തിന് തകര്‍പ്പന്‍ ജയം

ലണ്ടന്‍: യൂറോപ്പ ലീഗ് ഗ്രൂപ്പ് മത്സരത്തില്‍ പ്രീമിയര്‍ ലീഗ് ടീം ടോട്ടനം, സെല്‍റ്റിക്, വിയ്യാറയല്‍ തുടങ്ങിയ ടീമുകള്‍ തകര്‍പ്പന്‍ വിജയം നേടിയപ്പോള്‍ കരുത്തരായ ഇന്റമിലാനും സെവിയയും എവര്‍ട്ടണും സമനിലയില്‍ കുരുങ്ങി.

ഗ്രൂപ്പ് സിയില്‍ സ്വന്തം മണ്ണില്‍ നടന്ന കളിയില്‍ ഒന്നിനെതിരെ അഞ്ച് ഗോളുകള്‍ക്കാണ് ടോട്ടനം ഗ്രീക്ക് ടീം അസ്‌റ്റെറാസ് ട്രിപ്പോളിയെ തകര്‍ത്തുവിട്ടത്. ടോട്ടനത്തിന് വേണ്ടി ഹാരി കാനെ ഹാട്രിക്കും എറിക് ലമേല രണ്ടു ഗോളുകളും നേടി. 13, 75, 81 മിനിറ്റുകളിലാണ് ഹാരി കാനെയുടെ ഹാട്രിക്ക് പിറന്നത്. 29, 66 മിനിറ്റുകളിലാണ് എറിക് ലമേലയുടെ ഗോളുകള്‍. 87-ാം മിനിറ്റില്‍ ലോറിസ് ചുവപ്പുകാര്‍ഡ് കണ്ട് പുറത്തുപോയശേഷം പത്തുപേരുമായാണ് ടോട്ടനം കളിച്ചത്. തൊട്ടുപിന്നാലെ ബരാലസ് ട്രിപ്പോളിയുടെ ആശ്വാസഗോള്‍ നേടി. ഗ്രൂപ്പിലെ മറ്റൊരു മത്സരത്തില്‍ ബസ്‌കിറ്റാസ് മറുപടിയില്ലാത്ത നാല് ഗോളുകള്‍ക്ക് പാര്‍ട്ടിസാന്‍ ബല്‍ഗ്രേഡിനെ പരാജയപ്പെടുത്തി തകര്‍പ്പന്‍ വിജയം സ്വന്തമാക്കി.

ഗ്രൂപ്പ് എയില്‍ നടന്ന കളിയില്‍ വിയ്യാറയല്‍ ഒന്നിനെതിരെ നാല് ഗോളുകള്‍ക്ക് എഫ്‌സി സൂറിച്ചിനെ തകര്‍ത്തു. വിയ്യാറയലിനുവേണ്ടി ആറാം മിനിറ്റില്‍ ഗാര്‍ഷ്യ കല്‍മാച്ചെ 57-ാം മിനിറ്റില്‍ ലൂസിയാനോ വീറ്റോ, 60-ാം മിനിറ്റില്‍ സോലിയാനോ ലിഡോ, 78-ാം മിനിറ്റില്‍ ഡോസ് സാന്റോസ് എന്നിവര്‍ ഗോളുകള്‍ നേടി. സൂറിച്ചിന്റെ ഏക ഗോള്‍ 43-ാം മിനിറ്റില്‍ ഷോണ്‍ബാച്ച്‌ലറാണ് നേടിയത്. മറ്റൊരു മത്സരത്തില്‍ ബൊറൂസിയ മൊച്ചെന്‍ഗ്ലാബാഷ് 5-0ന് അപ്പോലോണ്‍ ലിമോസ്സോളിനെ തകര്‍ത്തുവിട്ടു.

ഗ്രൂപ്പ് ബിയില്‍ ടോറിനോ മറുപടിയില്ലാത്ത രണ്ട് ഗോളുകള്‍ക്ക് എച്ച്‌ജെകെ ഹെല്‍സിങ്കയെ പരാജയപ്പെടുത്തിയപ്പോള്‍ എഫ്‌സി കോപ്പന്‍ഹേഗന്‍- ക്ലബ് ബ്രുഗെ പോരാട്ടം 1-1ന് സമനിലയില്‍ കലാശിച്ചു.

ഗ്രൂപ്പ് ഡിയില്‍ നടന്ന കളികളില്‍ എഫ്‌സി റഡ് ബുള്‍ സാല്‍സ്ബര്‍ഗും സെല്‍റ്റിക്കും വിജയം കരസ്ഥമാക്കി. സെല്‍റ്റിക് ഒന്നിനെതിരെ രണ്ട് ഗോളുകള്‍ക്ക് ആസ്ട്ര ഗ്വിര്‍ഗ്യുവിനെയും റഡ്ബുള്‍ രണ്ടിനെതിരെ നാല് ഗോളുകള്‍ക്ക് ഡൈനാമോ സഗ്‌രബിനെയുമാണ് പരാജയപ്പെടുത്തിയത്.

ഗ്രൂപ്പ് ഇയില്‍ നടന്ന പോരാട്ടത്തില്‍ ഡൈനാമോ മോസ്‌കോ ഒന്നിനെതിരെ രണ്ട് ഗോളുകള്‍ക്ക് എസ്‌റ്റോറില്‍ പ്രായിയയെ പരാജയപ്പെടുത്തിയപ്പോള്‍ പനാത്തിനായിക്കോസ് പിഎസ്‌വി പോരാട്ടം 1-1ന് സമനിലയില്‍ കലാശിച്ചു.

ഗ്രൂപ്പ് എഫില്‍ നടന്ന പോരാട്ടത്തില്‍ ഫ്രഞ്ച് ടീം സെന്റ് എറ്റിന്നെയാണ് കരുത്തരായ ഇന്റമിലാനെ ഗോള്‍രഹിത സമനിലയില്‍ തളച്ചത്. ഗ്രൂപ്പ് ജിയില്‍ നടന്ന കളിയില്‍ സെവിയയെ സ്റ്റാന്‍ഡേര്‍ഡ് ലീഗെയാണ് ഗോള്‍രഹിത സമനിലയില്‍ കുടുക്കിയത്.

മറ്റ് മത്സരങ്ങളില്‍ നപ്പോളി മറുപടിയില്ലാത്ത രണ്ട് ഗോളുകള്‍ക്ക് ബിഎസ്‌സി യങ് ബോയ്‌സിനോട് പരാജയപ്പെട്ടപ്പോള്‍ ഫിയോറന്റീന 1-0ന് പസലോനിക്കയെയും സ്റ്റീവ ബുക്കാറസ്റ്റ് 2-1ന് റിയോ ആവേയെയും സ്പാര്‍ട്ട് പ്രാഗ് 3-0ന് സ്ലോവന്‍ ബാര്‍ട്ടിസ്ലാവയെയും പരാജയപ്പെടുത്തി. അതേസമയം എവര്‍ട്ടന്‍-ലില്ലെ പോരാട്ടം ഗോള്‍രഹിത സമനിലയിലും കലാശിച്ചു.