മലപ്പുറം: സുബ്രതോ കപ്പ് ഫുട്ബോള് ടൂര്ണമെന്റില് റണ്ണേഴ്സ്അപ്പ് ആയ മലപ്പുറം എംഎസ്പിഎച്ച്എസ്എസ് ടീമിന് നാടിന്റെ രാജകീയ സ്വീകരണം. ബ്രസീലിയന് സിംഹക്കുട്ടികളെ വിറപ്പിച്ച പുലിക്കുട്ടികള്ക്കുള്ള സ്വീകരണം രാജകീയവും ഒപ്പം സ്നേഹോഷ്മളവുമാക്കുകയായിരുന്നു ഇന്നലെ മലപ്പുറത്തുകാര്. കയ്യടികളോടെയും ആരവങ്ങള് മുഴക്കിയും റോഡിനിരുവശത്തും നിറഞ്ഞുനിന്ന സഹപാഠികള് ടീമംഗങ്ങളെ എതിരേറ്റപ്പോള് പടക്കം പൊട്ടിച്ചും മാലചാര്ത്തിയുമാണ് നാട്ടുകാര് ടീമിനെ എതിരേറ്റത്.
ഇന്നലെ ഉച്ചയ്ക്ക് രണ്ടു മണിയോടെയാണ് ടീം മലപ്പുറം കുന്നുമ്മലില് എത്തിച്ചേര്ന്നത്. കുന്നുമ്മല് എയുപി സ്കൂളിന് സമീപം എത്തിയ ടീമിനെ എംഎസ്പി കമാണ്ടന്റ് രാഹുല് ആര്. നായര് ഉപഹാരം നല്കി സ്വീകരിച്ചു. കുന്നുമ്മലില് നിന്ന് തുറന്ന വാഹനത്തില് ഘോഷയാത്രയായാണ് ടീമിനെ സ്കൂളിലേക്ക് ആനയിച്ചത്. ബാന്റ് സംഘവും താലപ്പൊലിയേന്തിയ ബാലികമാരുമെല്ലാം ഘോഷയാത്രയുടെ മുന്നില് നടന്നു നീങ്ങി. തുറന്ന ജിപ്പീല് മികച്ച ഗോള് കീപ്പറായി തെരഞ്ഞെടുക്കപ്പെട്ട എം.എസ്. സുജിത്, ടീം ക്യാപ്റ്റന് ടി. സുഹൈല്, കോച്ച് ബിനോയ് സി. ജെയിംസ് എന്നിവരും തൊട്ടുപുറകിലെ തുറന്ന വാഹനത്തില് ടീം അംഗങ്ങളായ എസ്. രാജില്, ഇ.എം അഭിജിത്, സുനില് സോളമന്, മുഹമ്മദ് ഷഹീദ്, എം.ജെ ജോണ്സ്, അരുണ് സുരേഷ്, വിഷ്ണു മനോജ്, ഗനി അഹമ്മദ് നിഗം, മാഹിന് പി. ഹുസൈന്, മുഹമ്മദ് ഷബീബ് ജാന്, പി. വിഷ്ണു, വിഷ്ണു ഭാസ്കരന്, കെ.പി. രാഹുല്, മുഹമ്മദ് നബീല് എന്നിവരും മാനേജര് സന്തോഷ്കുമാര്, അസിസ്റ്റന്റ് മാനേജര് ഷുഹൈബ് എന്നിവരും സഞ്ചരിച്ചു.
എംഎസ്പി സ്കൂളില് എത്തിയ ടീമിനെ ആര്പ്പുവിളികളോടെയാണ് കുട്ടികള് സ്വീകരിച്ചത്. സ്കൂളിലെ വേദിയിലെ സ്വീകരണത്തില് വെച്ച് ടീമംഗങ്ങളെ പരിചയപ്പെടുത്തിയശേഷം തൊട്ടടുത്ത എംഎസ്പി കമ്മ്യൂണിറ്റി ഹാളിലെ വേദിയിലേക്ക് ആനയിച്ചു. എംഎസ്പിഎച്ച്എസ്എസ് മാനേജിംഗ് കമ്മറ്റിയും എംഎസ്പി സേനാംഗങ്ങളും ചേര്ന്നാണ് കമ്മ്യൂണിറ്റി ഹാളില് സ്വീകരണയോഗം സംഘടിപ്പിച്ചത്.
സ്വീകരണസമ്മേളനം പി. ഉബൈദുള്ള എംഎല്എ ഉദ്ഘാടനം ചെയ്തു. ജില്ലാകലക്ടര് കെ. ബിജു അദ്ധ്യക്ഷത വഹിച്ചു. ടീമിനും ടീമംഗങ്ങളക്കുമുള്ള ക്യാഷ് അവാര്ഡും ഉപഹാരങ്ങളും എംഎല്എ വിതരണം ചെയ്തു. എസ്പി എസ്. ശശികുമാര്, എംഎസ്പി കമാന്റന്റ് രാഹുല് ആര് നായര്, ഡെപ്യൂട്ടി കമാന്റന്റ് കുരികേശ് മാത്യു തുടങ്ങിയവര് ആശംസ നേര്ന്നു. ഉച്ചയ്ക്ക് 12ഓടെയാണ് ന്യൂദല്ഹിയില് നിന്നുള്ള വിമാനത്തില് ടീം കരിപ്പൂര് വിമാനത്താവളത്തില് എത്തിച്ചേര്ന്നത്.
