ഗൃഹവും ലോകവും നിങ്ങള്ക്ക് ജീവിക്കുവാനും യോഗമഭ്യസിക്കാനും മോക്ഷപ്രാപ്തിക്കുള്ള പ്രവര്ത്തനമണ്ഡലങ്ങളാണ് കര്മ്മബദ്ധമായ ലോകം തന്നെയാണ് നിങ്ങള്ക്ക് സാധനയ്ക്കുള്ള ദിവ്യ വേദിയായിതീരേണ്ടത്. അതിന് ഈശ്വരകൃപ അനിവാര്യമാണ്. ഈശ്വരകൃപയാണു രക്ഷാകവചം. പ്രാരാബ്ദത്തിന്റെ ആയുധങ്ങളേയും ജീവിത പരീക്ഷണങ്ങളേയും പ്രതിരോധിക്കാന് ഈ രക്ഷാകവചം നിങ്ങളുടെ കരങ്ങളിലുണ്ടെങ്കില് പിന്നെ യാതൊന്നും പേടിക്കേണ്ടതില്ല. ദുരിതങ്ങള് വരികയും വെല്ലുവിളികള് ഭീതിപ്പെടുത്തുകയും ചെയ്യുമ്പോള് നിങ്ങള് അദ്ധ്യാത്മികാനുഷ്ഠാനത്തിലുള്ള നിഷ്ഠയില് സുസ്ഥിരമായി വര്ത്തിക്കണം. അനുഷ്ഠാനത്തിലുള്ള നിഷ്ഠയും ഹൃദയപൂര്വ്വമായ പ്രാര്ത്ഥനയും നിങ്ങളെ ഒരു ആദ്ധ്യാത്മീകാന്തരീക്ഷത്തില് എത്തിക്കും.
ഹൃദയശുദ്ധീകരണത്തിനും ജ്ഞാനത്തിനും ഭക്തിക്കുംവേണ്ടി നിരന്തരം പ്രാര്ത്ഥിക്കുവിന്. ഈശ്വരകരങ്ങളിലെ ഒരു വിശുദ്ധ ഉപകരണമായി തീരുവാന് പ്രാര്ത്ഥിക്കുക. പരമാത്മാവിനെ സ്വന്തം അമ്മയായി കരുതുകയും ആ നിലയില് അഭിസംബോധന ചെയ്യുകയും ചെയ്താല് ഒരു നിഷ്കളങ്ക ശിശുവിന്റെ ഭാവം നിങ്ങളില് വന്നുചേരും. അമ്മ സര്വ്വം ക്ഷമിക്കും പക്ഷേ അക്കാരണത്താല് നിങ്ങള് തെറ്റുകള് ആവര്ത്തിക്കരുത്. ധര്മ്മനിരതമായ പ്രവര്ത്തികളില് വ്യാപൃതരാകുക. പ്രാര്ത്ഥന ആന്തരികമായ ഒരു ആശയവിനിമയമാകണം. ഹൃദയത്തിന്റെ ഒരു ബഹിര്പ്രവാഹം ഭക്തിനിരതമായ സൗഹൃദത്തോടെ ഈശ്വരനുമായി നടത്തുക.
സദാസമയവും ആന്തരികമായ പ്രശാന്തതയോടും ഉന്മേഷത്തോടുംകൂടി വര്ത്തിക്കണം. മ്ലാനതയ്ക്ക് ഒരിക്കലും വശംവദരാകരുത്. ശക്തിമത്തായ പ്രതിബന്ധങ്ങളില് ഒന്നാണ് മ്ലാനത. നിസ്സാരകാര്യങ്ങളില്പോലും മൂകത പാടില്ലാത്തതാണ്. മൂകതയുടെ വേലിയേറ്റത്തില് നിങ്ങള്ക്ക് ധ്യാനം എളുപ്പമല്ല. ഗാഢമായ ആന്തരിക വിശകലനംകൊണ്ട് മ്ലാനതയുടെ നാരായവേര് കണ്ടെത്തണം. ക്ഷമയും തികഞ്ഞ ആത്മാര്ത്ഥതയും വേണം. മ്ലാനതയാകുന്ന മൂടല്മഞ്ഞിനു പുറത്തുവന്നാല് മാത്രമേ ആന്തരികപഥം തെളിഞ്ഞ് കാണാനും ഉത്കൃഷ്ടമായ സാധനയ്ക്ക് ശക്തിനേടാനും സാദ്ധ്യമാകയുള്ളൂ.
