സ്വര്‍ണ്ണമില്ല; ഇരട്ട വെങ്കലത്തോടെ ബിന്ദ്ര വിടവാങ്ങി

ഇഞ്ചിയോണ്‍: സ്വര്‍ണ്ണത്തോടെ ഷൂട്ടിംഗ് റേഞ്ചിനോട് വിടപറയാമെന്ന അഭിനവ് ബിന്ദ്രയുടെ സ്വപ്‌നം പൂവണിഞ്ഞില്ല. എങ്കിലും രണ്ട് വെങ്കലമെഡലുകള്‍ സ്വന്തമാക്കിയാണ് അഭിനവ് ബിന്ദ്ര എന്ന 32 കാരന്‍ കരിയറിലെ അവസാന പോരാട്ടം അവസാനിപ്പിച്ചത്. പതിനേഴാമത് ഏഷ്യന്‍ ഗെയിംസില്‍ 10 മീറ്റര്‍ എയര്‍ റൈഫിള്‍ വ്യക്തിഗത ഇനത്തിലും ടീം ഇനത്തിലും രാജ്യത്തിന് വേണ്ടി മെഡല്‍ സമ്മാനിക്കാന്‍ ആദ്യ ഒളിമ്പിക് സ്വര്‍ണ്ണമെഡല്‍ ജേതാവായ ബിന്ദ്രക്ക് കഴിഞ്ഞു.

ടീമിനത്തില്‍ ബിന്ദ്രയ്‌ക്ക് പുറമെ രവികുമാര്‍, സഞ്ജീവ് രജ്പുത് എന്നിവരടങ്ങിയ ടീം 1863 പോയിന്റോടെയാണ് വെങ്കലം നേടിയത്. 1886.4 പോയിന്റ് നേടിയ ചൈനക്കാണ് സ്വര്‍ണം. 1867 പോയിന്റോടെ ദക്ഷിണ കൊറിയ വെള്ളി നേടി. ബിന്ദ്ര 625.4 പോയിന്റും രവി കുമാര്‍ 618.9 പോയിന്റും സഞ്ജീവ് 618.7 പോയിന്റും നേടി. ഷൂട്ടിങ്ങില്‍ ഇന്ത്യ നേടുന്ന അഞ്ചാമത്തെ വെങ്കലമാണിത്. ഒരു സ്വര്‍ണവും അഞ്ചു വെങ്കലവും അടക്കം ആറ് മെഡലുകളാണ് ഇന്ത്യ ഷൂട്ടിംഗ് റേഞ്ചില്‍ നിന്ന് വെടിവെച്ചിട്ടത്.

വ്യക്തിഗത ഇനത്തില്‍ അഞ്ചാമനായാണ് ബിന്ദ്ര ഫൈനലിലേക്ക് യോഗ്യത നേടിയത്. ഒരുഘട്ടത്തില്‍ ബിന്ദ്ര ഒന്നാമതെത്തിയെങ്കിലും ആ മികവ് തുടര്‍ന്നുള്ള ഷൂട്ടില്‍ നിലനിര്‍ത്താന്‍ കഴിഞ്ഞില്ല. മൂന്ന് ഷോട്ടുകള്‍ കഴിഞ്ഞപ്പോള്‍ 31.1 പോയിന്റുമായി രണ്ടാം സ്ഥാത്തെത്തിയ ബിന്ദ്ര ആറ് ഷോട്ടുകള്‍ കഴിഞ്ഞപ്പോള്‍ 61.9 പോയിന്റുമായി നാലാമതായി. എട്ട് ഷോട്ടുകള്‍ കഴിഞ്ഞപ്പോള്‍ 83.1 പോയിന്റുമായി രണ്ടാം സ്ഥാനത്തേക്കുയര്‍ന്ന ബിന്ദ്ര പത്താം ഷോട്ട് കഴിഞ്ഞപ്പോള്‍ 104.2 പോയിന്റുമായി ഒന്നാമതെത്തി. എന്നാല്‍ 12 ഷോട്ടുകള്‍ കഴിഞ്ഞതോടെ ബിന്ദ്ര 124.1 പോയിന്റുമായി നാലാം സ്ഥാനത്തേക്ക് പിന്തള്ളപ്പെട്ടു.

14 ഷോട്ടുകള്‍ പൂര്‍ത്തിയായപ്പോള്‍ 145 പോയിന്റുമായി നാലാം സ്ഥാനത്തായിരുന്നു ഇന്ത്യയുടെ ഷാര്‍പ്പ് ഷൂട്ടര്‍. എന്നാല്‍ 16 ഷൂട്ടുകള്‍ കഴിഞ്ഞപ്പോള്‍ 165.8 പോയിന്റുമായി മൂന്നാം സ്ഥാനത്തേക്ക് ബിന്ദ്ര ഉയര്‍ന്നു. ബിന്ദ്രക്ക് കനത്ത വെല്ലുവിളി ഉയര്‍ത്തിയ ഇറാന്റെ പൗരിയ നൊറൗസിയാന് ഈ റൗണ്ടില്‍ ഉന്നം പിഴച്ചതാണ് ബിന്ദ്രക്ക് ഗുണകരമായത്. ഈ മികവ് അടുത്ത റൗണ്ടുകളിലും കാത്തതോടെ 187.1 പോയിന്റുമായി ബിന്ദ്ര വെങ്കലം സ്വന്തമാക്കി. ചൈനയുടെ യാങ് ഹവോറാന്‍ 198.8 പോയിന്റോടെ സ്വര്‍ണം നേടി മറ്റൊരു ചൈനീസ് താരമായ യിഫൈ സാവോ 198.5 പോയിന്റോടെ വെള്ളിയും സ്വന്തമാക്കി.

ലോകചാമ്പ്യന്‍ഷിപ്പ്, ഒളിമ്പിക്‌സ്, കോമണ്‍വെല്‍ത്ത് ഗെയിംസ് എന്നിവയില്‍ സ്വര്‍ണമെഡല്‍ ജേതാവായ ബിന്ദ്രയുടെ ആദ്യ വ്യക്തിഗത ഏഷ്യന്‍ ഗെയിംസ് മെഡലാണിത്. കഴിഞ്ഞ തവണ ഗ്വാങ്ഷുവില്‍ ബിന്ദ്ര അടങ്ങുന്ന ടീം വെള്ളി നേടിയിരുന്നു. അതേസമയം വ്യക്തിഗത ഇനത്തില്‍ മത്സരിച്ച മറ്റ് ഇന്ത്യന്‍ താരങ്ങളായ രവികുമാറിനും സഞ്ജീവ് രജ്പുതിനും ഫൈനലിന് യോഗ്യത നേടാനായില്ല. 618.9 പോയിന്റ് നേടിയ രവികുമാര്‍ ഇരുപതാമതും 618.7 പോയിന്റ് നേടിയ രജ്പുത് ഇരുപത്തിയൊന്നാമതുമാണ് ഫിനിഷ് ചെയ്തത്.