സീരി എ: മിലാന്‍ ടീമുകള്‍ക്ക് മിന്നുന്ന ജയം

മിലാന്‍: ഇറ്റാലിയന്‍ ലീഗില്‍ മുന്‍ ചാമ്പ്യന്മാരായ എസി മിലാന്‍, ഇന്റര്‍മിലാന്‍ ടീമുകള്‍ക്ക് മിന്നുന്ന ജയം. ഇന്റമിലാന്‍ മറുപടിയില്ലാത്ത ഏഴ് ഗോളുകള്‍ക്ക് സാസ്സുവോലെയെയും എസി മിലാന്‍ കരുത്തരായ പാര്‍മയെ നാലിനെതിരെ അഞ്ച് ഗോളുകള്‍ക്കും കീഴടക്കിയാണ് തകര്‍പ്പന്‍ വിജയം സ്വന്തമാക്കിയത്.

സാസ്സുവോലെക്കെതിരായ മത്സരത്തില്‍ അര്‍ജന്റീനന്‍ താരം മോറോ ഇക്കാര്‍ഡിയുടെ ഹാട്രിക്കാണ് ഇന്ററിന് ഗംഭീര വിജയം നേടിക്കൊടുത്തത്. ഈ സീസണില്‍ ലീഗില്‍ രണ്ട് മത്സരങ്ങള്‍ കളിച്ച ഇന്ററിന്റെ ആദ്യ വിജയമാണിത്. ആഗസ്റ്റ് 31ന് നടന്ന ആദ്യ മത്സരത്തില്‍ ടോറിനോ ഇന്ററിനെ ഗോള്‍ രഹിത സമനിലയില്‍ തളച്ചിരുന്നു. 4, 30, 53 മിനിറ്റുകളിലാണ് ഇക്കാര്‍ഡി എതിര്‍ വല കുലുക്കിയത്. ഓസ്‌വാള്‍ഡോ 43, 72 മിനിറ്റുകൡലും 21-ാം മിനിറ്റില്‍ കൊവാസിച്ചും 74-ാം മിനിറ്റില്‍ ഗ്വാറിനും ഇന്ററിനായി ഗോളുകള്‍ സ്‌കോര്‍ ചെയ്തു. കഴിഞ്ഞ സീസണിലും ഇന്റര്‍ സാസ്സുവോലെക്കെതിരെ 7-0ന്റെ വിജയം നേടിയിരുന്നു. കളിയുടെ 60-ാം മിനിറ്റില്‍ ഡൊമിനിക്കോ ബെരാര്‍ഡി ചുവപ്പുകാര്‍ഡ് കണ്ട് പുറത്തുപോയശേഷം സാസ്സുവോലെ 10 പേരുമായാണ് കളിച്ചത്.

ഗോള്‍മഴ കണ്ട മറ്റൊരു മത്സരത്തില്‍ എസി മിലാന്‍ നാലിനെതിരെ അഞ്ച് ഗോളുകള്‍ക്കാണ് പാര്‍മയെ കീഴടക്കിയത്. മിലാന് വേണ്ടി ജെര്‍മി മെനസ് രണ്ട് ഗോളുകള്‍ നേടി. 25-ാം മിനിറ്റില്‍ ബൊനാവെഞ്ച്വറയിലൂടെ എസി മിലാന്‍ ലീഡ് നേടിയെങ്കിലും രണ്ട് മിനിറ്റിനുശേഷം പാര്‍മ കസാനോയിലൂടെ സമനില പിടിച്ചു. പത്ത് മിനിറ്റിനുശേഷം കളിയുടെ 37-ാം മിനിറ്റില്‍ ജപ്പാന്‍ താരം കെയ്‌സുകി ഹോണ്ടയിലൂടെ മിലാന്‍ വീണ്ടും ലീഡ് നേടി. പിന്നീട് 45-ാം മിനിറ്റില്‍ ലഭിച്ച പെനാല്‍റ്റി ലക്ഷ്യത്തിലെത്തിച്ച് മെനസ് മിലാന്റെ ലീഡ് ഉയര്‍ത്തി. 51-ാം മിനിറ്റില്‍ ഫിലിപ്പെ പാര്‍മക്ക് വേണ്ടി ലക്ഷ്യം കണ്ടതോടെ ഗോള്‍നില 2-3 എന്ന നിലയിലായി. തുടര്‍ന്നും ആവേശ പോരാട്ടം നടക്കുന്നതിനിടെ എസി മിലാന്‍ താരം ബൊനേരക്ക് രണ്ടാം മഞ്ഞകാര്‍ഡും ചുവപ്പുകാര്‍ഡും കണ്ട് പുറത്തു പോകേണ്ടിവന്നതോടെ 10 പേരായി ചുരുങ്ങി. എങ്കിലും ശക്തമായ ആക്രമണം അഴിച്ചുവിട്ട മിലാന്‍ 68-ാം മിനിറ്റില്‍ ഡി ജോംഗിലൂടെ നാലാം ഗോള്‍ നേടി. അഞ്ച് മിനിറ്റിനുശേഷം ലുക്കാറെല്ലിയിലൂടെ പാര്‍മ ഒരു ഗോള്‍ കൂടി മടക്കിയെങ്കിലും 79-ാം മിനിറ്റില്‍ ജെര്‍മി മെനസ് വീണ്ടും ലക്ഷ്യം കണ്ടതോടെ മിലാന്‍ 5-3ന് മുന്നിട്ടുനിന്നു. ഇതിനിടെ 77-ാം മിനിറ്റില്‍ പാര്‍മയുടെ ഫിലിപ്പെയും ചുവപ്പുകാര്‍ഡ് കണ്ട് പുറത്തുപോയി. 89-ാം മിനിറ്റില്‍ എസി മിലാന്‍ താരം ഡി സിഗ്ലിയോ പാര്‍മക്കായി ഒരു സെല്‍ഫ് ഗോള്‍ ദാനമായി നല്‍കിയെങ്കിലും പരാജയത്തില്‍ നിന്ന് രക്ഷപ്പെടാന്‍ കഴിഞ്ഞില്ല.

മറ്റു കളികളില്‍ ലാസിയോ എതിരില്ലാത്ത മൂന്ന് ഗോളുകള്‍ക്ക് സെസേനയെയും അറ്റ്‌ലാന്റ ഒന്നിനെതിരെ രണ്ട് ഗോളുകള്‍ക്ക് കാഗ്ലിയാരിയെയും സാംപ്‌ദോറിയ 2-0ന് ടോറിനോയെയും തോല്‍പ്പിച്ചപ്പോള്‍ കരുത്തരായ നാപ്പോളിയെ ചീവോ ഏകപക്ഷീയമായ ഒരു ഗോളിന് അട്ടിമറിച്ചു. ഫിയോറന്റീന-ജെനോവ പോരാട്ടം ഗോള്‍രഹിത സമനിലയിലും കലാശിച്ചു.

രണ്ട് കളികള്‍ പൂര്‍ത്തിയായ ലീഗില്‍ എസി മിലാന്‍ ആറ് പോയിന്റുമായി ഒന്നാമത് നില്‍ക്കുന്നു. ആറ് പോയിന്റ് വീതമുള്ള ജുവന്റസും റോമയുമാണ് രണ്ടും മൂന്നും സ്ഥാനങ്ങളില്‍.