ഒരു വ്യക്തി പാര്ക്കുന്ന വീടിന് ആ വ്യക്തിയുടെ ആരോഗ്യവും സമ്പത്ത്, മനസ്സുഖം, ഭാഗ്യം, കുടുംബസുഖം എന്നിങ്ങനെ ജീവിതത്തിലെ എല്ലാ തലങ്ങളുമായും ബന്ധമുണ്ടായിരിക്കും എന്ന് ഭാരതീയ വാസ്തു ശാസ്ത്രം സിദ്ധാന്തിക്കുന്നു. ഒരു ഗൃഹം നിര്മ്മിക്കുന്നതിന് ഉത്തമമായ ഭൂമി മതെരഞ്ഞെടുക്കുന്നതുമുതല് ഗൃഹപ്രവേശം വരെയുള്ള സമസ്ത കാര്യങ്ങളും ശാസ്ത്രീയമായി പ്രതിപാദിക്കുന്ന ഭാരതീയ വാസ്തുവിദ്യ നിയമങ്ങളുടെയും കണക്കുകളുടെയും ഒരു സമുച്ചയം മാത്രമല്ല ഒരു ദര്ശനം കൂടിയാണ്. സര്വ്വജീവജാലങ്ങള്ക്കും ആഹാരം, വസ്ത്രം, പാര്പ്പിടം എന്നിത്യാദി സര്വ്വസ്വവും നല്കുന്ന ഭൂമിയെ ഭാരതീയര് മാതാവായാണ് അഭിദര്ശിക്കുന്നത്. ആ ഭൂമിമാതാവും പ്രകൃതിയും ഗൃഹവും അതില് വസിക്കുന്ന വ്യക്തികളും തമ്മില് എപ്പോഴും ഒരു പാരസ്പര്യം ഉണ്ടാകേണ്ടത് അത്യന്താപേക്ഷിതമാണ്. ഈ പാരസ്പര്യം അഥവാ പരസ്പരമുള്ള പൊരുത്തം ഉണ്ടാക്കിയെടുക്കുക എന്നതാണ് പൊതുവെ വാസ്തു ശാസ്ത്രത്തിന്റെ ലക്ഷ്യം. സ്ഥാനനിര്ണയം, ദിങ്നിര്ണയം, ഖണ്ഡങ്ങള്, സൂത്രങ്ങള്, വീഥികള്, പദങ്ങള്, മര്മ്മങ്ങള്, യോനികള്, നക്ഷത്രങ്ങള്, ദശകള്, തിഥികള്, ആഴ്ചകള്, ആയവ്യയങ്ങള് എന്നിങ്ങനെ നിരവധി ഘടകങ്ങള് ഉള്ചേര്ന്നതാണ് ഗാര്ഹിക വാസ്തുവിദ്യ. ഇവയെക്കുറിച്ചുള്ള പൂര്ണമായ വിവരണം ഉള്പ്പെടുത്തുക പ്രായോഗികമല്ല. ഗൃഹനിര്മാണത്തിന് ഉത്തമമായ ഭൂമി തെരഞ്ഞെടുക്കുന്നതുമുതല് ഗൃഹപ്രവേശം വരെയുള്ള കര്മങ്ങള് വാസ്തുശാസ്ത്രവിധിപ്രകാരം തന്നെ നടത്തുക എന്നത് ആ ഗൃഹത്തില് ഐശ്വര്യത്തോടെയും ആയുരാരോഗ്യസൗഖ്യത്തോടെയും ജീവിക്കുന്നതിന് അത്യന്താപേക്ഷിതമാണ്.
-ഡോ. കെ. ബാലകൃഷ്ണവാര്യര്
