കാക്കനാട്: കൊച്ചി നഗരത്തിലെ സ്വകാര്യ ബസുകള്ക്ക് വാതില് ഘടിപ്പിക്കുന്നത് സംബന്ധിച്ച് ബസുടമകള് സമ്പാദിച്ച സ്റ്റേ നീക്കം ചെയ്യാന് റീജണല് ട്രാന്സ്പോര്ട്ട് അതോറിറ്റി നിയമ നടപടി സ്വീകരിക്കുന്നു. തിങ്കളാഴ്ച മുതല് സ്വകാര്യബസുകള്ക്ക് വാതിലുകള് ഘടിപ്പിക്കുന്നതു നിര്ബന്ധമാക്കിയ എറണാകുളം റീജണല് ട്രാന്സ്പോര്ട് അതോറിറ്റിയുടെ (ആര്ടിഎ) ഉത്തരവാണ് സ്റ്റേറ്റ് ട്രാന്സ്പോര്ട്ട് അപലേറ്റ് ട്രിബൂണല് സ്റ്റേ ചെയ്തത്. ഇതിനെതിരെ സര്ക്കാരിന്റെ സഹായത്തോടെ ട്രാന്സ്പോര്ട്ട് അപലേറ്റ് ട്രിബൂണലില് അപ്പീല് നല്കാനാണു ആര്ടിഎയുടെ തീരുമാനം.
നിലവിലെ കേരള മോട്ടോര് വെഹിക്കിള് ആക്ടിലെ 280(2) വകുപ്പ് പ്രകാരം ബസ്സുകള്ക്ക് സിറ്റിയില് ഓടുന്നതിനു കതക് നിര്ബന്ധമില്ല. എന്നാല്, നഗരത്തില് സര്വീസ് നടത്തുന്ന സ്വകാര്യ ബസുകളില് നിന്ന് നിരവധി തവണ യാത്രക്കാര് തെറിച്ചു വീണു മരണം സംഭവിച്ചതിനെ തുടര്ന്നാണു കതക് ഘടിപ്പിക്കാന് അധികൃതര് തീരുമാനിച്ചത്. ബസുകളില് വാതിലുകളില്ലാത്തതിന്റെ അപകടാവസ്ഥ സ്റ്റേറ്റ് ട്രാന്സ്പോര്ട് അപലേറ്റ് ട്രിബൂണലിനെ ബോധ്യപ്പെടുത്തുമെന്നും റീജണല് ട്രാന്സ്പോര്ട് അതോറിറ്റി അധികൃതര് അറിയിച്ചു
ബസുകളില് ന്യൂമാറ്റിക് കതകുകളോ അല്ലെങ്കില് സാധാരണ കതകുകളോ പിടിപ്പിക്കണമെന്നായിരുന്നു ആര്ടിഎ ഉത്തരവിട്ടിരുന്നത്. ഡ്രൈവര്ക്ക് പ്രവര്ത്തിപ്പിക്കാവുന്ന ന്യൂമാറ്റിക് ഡോറുകളല്ലെങ്കില് ബസുടമകള്ക്ക് ഒരു ഡോര് ചെക്കറുടെ സേവനം കൂടി ഉറപ്പുവരുത്തണമെന്നും ഉത്തരവില് നിര്ദേശിച്ചിരുന്നു. ഇതനുസരിച്ചാണ് സപ്തംബര് ഒന്നു മുതല് സിറ്റി ബസുകളില് കതക് ഘടിപ്പിക്കണമെന്നും ആര്ടിഎ ബോര്ഡ് യോഗം വ്യക്തമാക്കിയത്.
ആര്ടിഎ ചെയര്മാന് കൂടിയായ ജില്ലാ കളക്ടര് എം.ജി. രാജമാണിക്യം ഉത്തരവ് അന്തിമമാക്കുകയും ചെയ്തിരുന്നു. അതിനിടെയാണ് സ്റ്റേറ്റ് ട്രാന്സ്പോര്ട്ട് അപലേറ്റ് ട്രിബൂണല് ഉത്തരവ് ബസ് ഉടമകള്ക്ക് അനുകൂലമായി ലഭിച്ചതോടെ ബസുകളില് കതക് ഘടിപ്പിക്കാനുള്ള ഉത്തരവ് അപ്രസക്തമായത്.
