ന്യൂദല്ഹി: ഇന്റര്നെറ്റോ, ഡേറ്റാ കണക്ടിവിറ്റിയോ ഇല്ലാതെ തന്നെ ബിഎസ്എന്എല് ഉപഭോക്താക്കള്ക്ക് ഇനി മുതല് മൊബെയില്ഫോണുകളില് ഫേസ്ബുക്ക് ലഭ്യമാകും. പൊതുമേഖലാ സ്ഥാപനമായ ബിഎസ്എന്എല് “യു2 ഓപിയ” എന്ന മൊബെയില് കമ്പനിയുമായി കൈകോര്ത്താണ് ഉപഭോക്താക്കള്ക്കായി പുതിയ പദ്ധതി മുന്നോട്ടുവെക്കുന്നത്.
തെക്ക്- കിഴക്കന് സോണുകളില് ആദ്യം ആരംഭിക്കുന്ന സേവനം ഉടന് തന്നെ വടക്ക്-പടിഞ്ഞാറന് സോണുകളിലേക്കും വ്യാപിപ്പിക്കുമെന്ന് അധികൃതര് പറഞ്ഞു. 4, 10, 20 രൂപാനിരക്കില് മൂന്ന് ദിവസത്തേക്കും, ഒരാഴ്ച, ഒരു മാസം എന്നിങ്ങനെയുള്ള പാക്കേജുകളിലും ഫേസ്ബുക്ക് സേവനം ലഭ്യമാകും.
അണ്സ്ട്രക്ചേര്ഡ് സപ്ലിമെന്ററി സര്വ്വീസ് ഡേറ്റ( യുഎസ്എസ്ഡി) എന്ന സാങ്കേതികവിദ്യയാണ് ഇതിനുവേണ്ടി ഉപയോഗിച്ചിരിക്കുന്നത്. യുഎസ്എസ്ഡി ഉപയോഗിച്ച് ടെലികോം ഓപ്പറേറ്റേഴ്സ് ഉപഭോക്താക്കളുടെ ഫോണുകളിലേക്ക് സന്ദേശങ്ങള് അയക്കും. ഇത് പ്രി-പെയ്ഡ് കോള്ബാക്ക് സര്വ്വീസായും ലൊക്കേഷന് ബേസ്ഡ് കണ്ടന്റ് സര്വ്വീസായും, മെനു ബേസ്ഡ് ഇന്ഫൊര്മേഷന് സര്വ്വീസായും ഉപയോഗിക്കാം.
യുഎസ്എസ്ഡി പ്രാപ്തമാക്കുന്ന ഉപഭോക്താക്കള്ക്ക് അവരുടെ ഫേസ്ബുക്ക് അക്കൗണ്ടുകള് നോക്കാനും, സന്ദേശങ്ങള് നോക്കാനും, പോസ്റ്റ് ചെയ്യാനും സാധിക്കും. ഫേസ്ബുക്കിലെ സുഹൃത്തുക്കളുമായി സന്ദേശങ്ങള് കൈമാറാനും കഴിയും. സോഷ്യല് നെറ്റ്വര്ക്കിംഗ് സൈറ്റുകളുടെ പ്രചാരം വര്ധിച്ചതാണ് ഇത്തരമൊരു സംരംഭം ഉപഭോക്താക്കള്ക്കുവേണ്ടി ആരംഭിക്കാന് കാരണമെന്ന് ബിഎസ്എന്എല് ഡയറക്ടര് അനുപം ശ്രീവാസ്തവ പറഞ്ഞു. എല്ലാത്തരം മൊബെയില്ഫോണുകളിലും സേവനം ലഭ്യമാകും. ലോകത്തിന്റെ എവിടെ വേണമെങ്കിലും ഏതു സമയത്തും ഏതു മൊബെയിലില് നിന്നും സേവനം ലഭിക്കുമെന്ന് യു2 ഒപിയ മൊബെയില് സിഇഒ സുമേഷ് മേനോന് പറഞ്ഞു.
