കൊച്ചി: മലിനീകരണം തടയുന്നതിന്‌ കാര്യക്ഷമമായപ്രവര്‍ത്തനങ്ങള്‍ ഉണ്ടാവണമെന്നും മലിനീകരണം നിയന്ത്രിക്കുകയെന്നത്‌ രോഗപ്രതിരോധത്തിന്‌ അത്യാവശ്യം വേണ്ടകാര്യമാണെന്നും മന്ത്രി ആര്യാടന്‍ മുഹമ്മദ്‌ അഭിപ്രായപ്പെട്ടു. വ്യവസായങ്ങള്‍ ആവശഅയമാണ്‌. വ്യവസായങ്ങളില്‍നിന്ന്‌ മാലിന്യങ്ങള്‍ ഉണ്ടാവുന്നത്‌ തടയുന്നതിനും പ്രാധാന്യം നല്‍കണമെന്നും അദ്ദേഹം പറഞ്ഞു.
സംസ്ഥാന മലിനീകരണ നിയന്ത്രണബോര്‍ഡിന്റെ കേന്ദ്ര പരീക്ഷണശാലക്ക്‌ ലഭിച്ച എന്‍ എ ബി എല്‍ അക്രിഡിറ്റേഷന്‍ സര്‍ട്ടിഫിക്കേറ്റ്‌ വിതരണ ചടങ്ങില്‍ സംസാരിക്കുകയായിരുന്നു അദ്ദേഹം. സംസ്ഥാന മലിനീകരണ നിയന്ത്രണ ബോര്‍ഡ്‌ കാര്യക്ഷമമായിതന്നെപ്രവര്‍ത്തിക്കുന്നുവെന്നതിന്റെ തെളിവാണ്‌ ബോ ര്‍ഡിന്റെ പരീക്ഷണ ശാലക്ക്‌ ലഭിച്ച അംഗീകാരമെന്നും അദ്ദേഹം പറഞ്ഞു. മലനീകരണ നിയന്ത്രണബോര്‍ഡിന്റെ പ്രവര്‍ത്തനങ്ങള്‍ കൂടുതല്‍ ശക്തിപ്പെടുത്തുന്നതിനുസഹായകമായ തീരുമാനങ്ങള്‍ തെരഞ്ഞെടുപ്പു പെരുമാറ്റചട്ടത്തില്‍ ഇളവ്‌ വരുന്നതനുസരിച്ച് ഉണ്ടാകും.
മലിനീകരണ നിയന്ത്രണബോര്‍ഡുപോലുള്ള സ്ഥാപനങ്ങളുടെ പ്രവര്‍ത്തനങ്ങള്‍ കൂടുതല്‍ വിശ്വസ്തതയോടെ നടക്കേണ്ട കാലഘട്ടമാണ്‌ വന്നുചേര്‍ന്നിരിക്കുന്നതെന്ന്‌ സമ്മേളനം ഉദ്ഘാടനം ചെയ്ത മന്ത്രി കെ ബാബു പറഞ്ഞു. സംസ്ഥാനത്തെ ഏല്ലാവിധ വികസനപദ്ധതികളുമായി ബന്ധപ്പെട്ട്‌ പരിസ്ഥിതി പഠനങ്ങള്‍ നടത്തേണ്ട ഉത്തരവാദിത്തമാണ്‌ ബോര്‍ഡിനുള്ളതെന്നും വന്‍കിട പദ്ധതികളുമായിബന്ധപ്പെട്ട്‌ പരിസ്ഥിതി പ്രശ്നങ്ങളുമായിബന്ധപ്പെട്ട്‌ പൊതുജനങ്ങളില്‍നിന്ന്‌ പരാതികേള്‍ക്കേണ്ട ചുമതലയും ബോര്‍ഡിനാണെന്നതിനാല്‍തന്നെ മലിനീകരണനിയന്ത്രണബോര്‍ഡിന്റെ പ്രസക്തിവര്‍ധിച്ചിരിക്കുകയാണെന്നും മന്ത്രി കെ ബാബു ചൂണ്ടിക്കാട്ടി. ഏലൂര്‍ വ്യവസായമേഖലയില്‍ പുഴയില്‍ മത്സ്യങ്ങള്‍ ചത്തുപൊങ്ങുന്നതുസംബന്ധിച്ച്‌ അടിക്കടിവാര്‍ത്തയാവുന്ന സാഹചര്യത്തില്‍ ഇതിന്റെ കാരണങ്ങള്‍ കണ്ടെത്തുന്നതിനും വ്യവസായശാലകളില്‍നിന്നുള്ള മാലിന്യമാണ്‌ ഇതിനുകാരണമെങ്കില്‍ അത്തരം വ്യവസായ ശാലകള്‍ അടച്ചുപുട്ടുന്നതിനുള്ള നടപടികളുണ്ടാവേണ്ടതുണ്ടെന്നും അദ്ദേഹം പറഞ്ഞു. പരീക്ഷണ ശാലയുടെ ലഘുലേഖ പ്രകാശനം ഹൈബി ഈഡന്‍ എം എല്‍ എ നിര്‍വഹിച്ചു.
മേയര്‍ ടോണിചമ്മണി ചടങ്ങില്‍ അധ്യക്ഷതവഹിച്ചു. മലിനീകരണ നിയന്ത്രണ ബോര്‍ഡ്‌ ചെയര്‍മാന്‍ കെ. സജീവന്‍, അഡീഷണല്‍ ചീഫ്‌ സെക്രട്ടറി പി.കെ. മൊഹന്തി, മെമ്പര്‍സെക്രട്ടറി പി.മോളികുട്ടി, കെ.കെ. ജിന്നാസ്‌ തുടങ്ങിയവര്‍ സംസാരിച്ചു. വി രാമ ചന്ദ്രന്‍ റിപ്പോര്‍ട്ട്‌ അവതരിപ്പിച്ചു. എന്‍ എ ബി എല്‍ അക്രിഡിറ്റേഷന്‍ സര്‍ട്ടിഫിക്കേറ്റ്‌ മന്ത്രി ആര്യാടന്‍മുഹമ്മദ്‌ പി.കെ. മൊഹന്തിക്ക്‌ കൈമാറി.
