കൊച്ചി: തൃക്കാക്കര മുന്സിപ്പല് കമ്മ്യൂണിറ്റി ഹാളിനു മുന്നിലെ ടാക്സി സ്റ്റാന്ഡില് വിശ്രമിച്ച ടാറ്റാ ഇന്ഡിക്ക കാറുകളുടെ ഗിയര് മാറ്റി ആത്മവിശ്വാസത്തോടെയാണ് പുതിയ വനിതസംരംഭകര് നിരത്തിലിറക്കിയത്. അടുക്കളയില് നിന്ന് അരങ്ങത്തേയ്ക്കുള്ള അവരുടെ ജീവിതത്തിന്റെ ഈ ചുവടുമാറ്റം ഫ്ലാഗ് ഓഫ് ചെയ്തത് പഞ്ചായത്ത് സാമൂഹ്യ നീതി വകുപ്പു മന്ത്രി ഡോ. എം. കെ. മുനീര്. ബെന്നി ബഹന്നാന് എംഎല്എയും ജനപ്രതിനിധികളും ഉദ്യോഗസ്ഥരും കുടുംബശ്രീയുടെ ജില്ലയിലെ വനിത ശാക്തീകരണത്തിന്റെ പുതിയ ചുവടുവയ്പിന് സാക്ഷികളായപ്പോള് മാധ്യമപ്രവര്ത്തകര് ആദ്യയാത്രക്കാരായി.
പശ്ചിമ കൊച്ചിക്കാരായ സുധ പ്രസാദ്, കൊച്ചുത്രേസ്യ, കളമശ്ശേരിക്കാരായ റൗഹാനത്ത്, സല്മ, തിരുവാങ്കുളത്തു നിന്നുള്ള ലേഖ, തൃപ്പൂണിത്തുറയില് നിന്നുള്ള ബിന്ദു ധനേഷ് എന്നിവരാണ് കുടുംബശ്രീ ട്രാവല്സിന്റെ ജില്ലയിലെ ആദ്യത്തെ ഡ്രൈവര്മാര്. ഒരു വര്ഷം മുമ്പ് ഡ്രൈവിങ് പഠിച്ച് ലൈസന്സ് എടുത്തവരാണ് എല്ലാവരും. കുടുംബശ്രീ സിഡിഎസ് മുഖേന ലഭിച്ച 118 അപേക്ഷകരില് നിന്നുമാണ് ഇവരെ തിരഞ്ഞെടുത്തത്. മാരുതി പോപ്പുലര് മോട്ടോഴ്സാണ് പരിശീലകര്. സ്ത്രീകളുടെ സുരക്ഷിതമായ യാത്രയ്ക്കായി കുടുംബശ്രീ ട്രാവല്സ് മെയ് 12 മുതല് നിരത്തിലിറങ്ങുമ്പോള് ജില്ലയിലെ വനിത ശാക്തീകരണത്തിന്റെ മുഖങ്ങള് കൂടിയാവുന്നു ഇവര്.
കുടുംബശ്രീ ട്രാവല്സ് പദ്ധതി നടപ്പിലാക്കുന്ന സംസ്ഥാനത്തെ രണ്ടാമത്തെ ജില്ലയാണ് എറണാകുളം. പ്രധാനമായും ഇന്ഫോ പാര്ക്ക്, എയര്പോര്ട്ട്, റയില്വേ സ്റ്റേഷന് എന്നീ സ്ഥലങ്ങള് കേന്ദ്രീകരിച്ച് പ്രവര്ത്തിക്കുന്ന ടാക്സി സര്വീസ് രാത്രി എട്ടു മണിവരെ ലഭ്യമാണ്. ഇപ്പോള് കോള്സെന്റര് സംവിധാനമുപയോഗിച്ച് പ്രവര്ത്തിക്കുന്ന സര്വീസ് താമസിയാതെ എസ്എംഎസ്, ഇന്റര്നെറ്റ് എന്നിവ മുഖേനയും ബുക്ക് ചെയ്യാന് കഴിയുമെന്ന് കുടുംബശ്രീ ജില്ലാ മിഷന് കോര്ഡിനേറ്റര് റ്റാനി തോമസ് പറഞ്ഞു. കോള്സെന്റര് നമ്പര് 8281771212. വനിതായാത്രക്കാര്ക്കും വനിതകളോടു കൂടിയ പുരുഷയാത്രക്കാര്ക്കും ഇതിന്റെ പ്രയോജനം ലഭിക്കും.
