ബെര്ലിന്: ജര്മ്മന് സൂപ്പര് ക്ലബ്ബ് ബയേണ് മ്യൂണിച്ചിനെ തച്ചുതകര്ത്ത് സ്പാനിഷ് വമ്പന്മാരായ റയല് മാഡ്രിഡ് ചാമ്പ്യന്സ് ലീഗ് ഫുട്ബോളിന്റെ ഫൈനലില് കടന്നു. രണ്ടാംപാദ സെമിയില് എതിരില്ലാത്ത നാലു ഗോളുകള്ക്കാണ് ബയേണിനെ റയല് മുക്കിയത്.
സാന്റിയാഗോ ബര്ണബ്യൂവില് നടന്ന ആദ്യ മുഖാമുഖത്തില് റയല് 1-0ത്തിന് ജയിച്ചിരുന്നു. ഇതോടെ 5-0 എന്ന ആധികാരികമായ അഗ്രഗേറ്റ് സ്കോര് ഉറപ്പിക്കാനും റയലിനായി. ഒരു വ്യാഴവട്ടത്തിനിടെ ഇതാദ്യമായാണ് ചാമ്പ്യന്സ് ലീഗിന്റെ കലാശക്കളിക്ക് റയല് അര്ഹത നേടുന്നത്.
ചെല്സി- അത്ലറ്റിക്കോ മാഡ്രിഡ് പോരാട്ടത്തിലെ വിജയികളെ ഫൈനലില് റയല് നേരിടും. ബയേണിന്റെ തട്ടകമായ അലയന്സ് അരേനയില് റയല് നിറഞ്ഞുകളിക്കുകയായിരുന്നു. സെര്ജിയോ റാമോസും തുറുപ്പുചീട്ട് ക്രിസ്റ്റ്യാനോ റൊണാള്ഡോയും ഇരട്ടഗോളുകളിലൂടെ അവര്ക്കുവേണ്ടി മിന്നിത്തിളങ്ങി.
16-ാം മിനിറ്റില് ലൂക്കാ മോഡ്രിച്ചിന്റെ അളന്നുമുറിച്ച കോര്ണര് റാമോസ് ബുള്ളര് ഹെഡ്ഡറിലൂടെ വലയിലെത്തിക്കുമ്പോള് ബയേണ് വിറച്ചുപോയി (1-0). അതിന്റെ ആഘാതത്തില് നിന്ന് കരകയറും മുന്പേ ഡൈവിങ് ഹെഡ്ഡറിലുടെ റാമോസ് (20-ാം മിനിറ്റ്) വീണ്ടും ബയേണിനെ പ്രഹരിച്ചു (2-0).
34-ാം മിനിറ്റില് ക്രിസ്റ്റ്യാനോയും സ്കോര് ഷീറ്റിലെത്തി (3-0). ഒടുവില് കളിയുടെ അവസാന മിനിറ്റില് 20 വാര അകലെ നിന്നുള്ള ഫ്രീ കിക്ക് ലക്ഷ്യത്തിലെത്തിച്ച് ക്രിസ്റ്റ്യാനോ അരിശംതീര്ക്കുമ്പോള് ബയേണിന്റെ പതനം പൂര്ണം (4-0). ചാമ്പ്യന്സ് ലീഗ് സീസണില് ഏറ്റവും കൂടുതല് ഗോള് നേടുന്ന താരമെന്ന പെരുമ ക്രിസ്റ്റ്യാനോ (16) സ്വന്തമാക്കുന്നതിനും ഗ്യാലറി സാക്ഷിയായി. ബാഴ്സലോണയുടെ അര്ജന്റൈന് താരം ലയണല് മെസിയുടെ (14) റെക്കോര്ഡാണ് സിആര്7 മറികടന്നത്.
