ഷാര്ജ: ഐപിഎല് ആവേശം നിറഞ്ഞ കളിയില് ജയിക്കാമായിരുന്ന കളിവിട്ട് ബാംഗ്ലൂര് റോയല് ചലഞ്ചേഴ്സ് കൊല്ക്കത്ത നൈറ്റ് റൈഡേഴ്സിനോട് തോറ്റു. അവസാന ഓവറുവരെ ആവേശം നിറഞ്ഞ മത്സരത്തില് രണ്ട് റണ്സിനാണ് കൊല്ക്കത്തയുടെ ജയം. കൊല്ക്കത്ത നേടിയ 150 റണ്സ് പിന്തുടര്ന്നെത്തിയ ബാംഗ്ലൂരിന് അഞ്ച് വിക്കറ്റ് നഷ്ടത്തില്148 റണ്സെടുക്കാനേ കഴിഞ്ഞുള്ളൂ.
കൊല്ക്കത്തയുടെ ക്രിസ് ലെയ്നാണ് മാന് ഓഫ് ദ മാച്ച്. ടോസ് നേടിയ ബാംഗ്ലൂര് ഫീല്ഡിങ്ങ് തെരഞ്ഞെടുക്കുയായിരുന്നു. ക്രിസ് ലെയ്നിന്റെയും (45), ജാക്വസ് കാലിസിന്റെയും (42) ബാറ്റിങ്ങ് മികവില് കൊല്ക്കത്ത ഏഴ് വിക്കറ്റ് നഷ്ടത്തില് 150 റണ്സെടുത്തു. മറുപടി ബാറ്റിങ്ങില് ഓപ്പണര്മാരായ പാര്ഥിവ് പട്ടേല്(21), യോഗേഷ് ടക്കേവാല(40) എന്നിവര് നല്കിയ മികച്ച തുടക്കത്തില് വിജയത്തിലേക്ക് കുതിക്കുകയായിരുന്ന ബാംഗ്ലൂരിനെ അവസാന ഓവറില് കൊല്ക്കത്ത ഫീല്ഡിങ്ങിന്റെയും ബൗളിങ്ങിന്റെയും മികവില് തോല്പ്പിക്കുകയായിരുന്നു.
വിനയ്കുമാര് എറിഞ്ഞ അവസാന ഓവറില് ഒമ്പത് റണ്സാണ് ബാംഗ്ലൂരിന് ജയിക്കാന് വേണ്ടിയിരുന്നത്. എന്നാല് നാലാം പന്ത് സിക്സറിന് പറത്താന് ശ്രമിച്ച എബി ഡിവില്യേഴ്സിനെ(11) ബൗണ്ടറി ലൈനിനരികില് നിന്ന് ക്രിസ് ലെയ്ന് മികച്ച ഒരു ക്യാച്ചിലൂടെ പുറത്താക്കുകയായിരുന്നു. ഐപിഎല് ഏഴാം സീസണിലെ തന്നെ തകര്പ്പന് ഒരു ക്യാച്ചായിരുന്നു അത്. കളിയില് വിനയ്കുമാര് രണ്ട് വിക്കറ്റും വീഴ്ത്തി. ബാംഗ്ലൂരിന് വേണ്ടി വിരാട് കോഹ്ലിയും(31) യുവരാജ് സിങും(31) മികച്ച പ്രകടനം നടത്തി.
