ഷാര്ജ: മുന് ഇന്ത്യന് ഫാസ്റ്റ് ബൗളര് ലക്ഷ്മീപതി ബാലാജിയുടെ തകര്പ്പന് ബൗളിംഗിന് മുന്നില് സണ്റൈസേഴ്സ് ഹൈദരാബാദും മുട്ടുമടക്കി. നാല് ഓവറില് 13 റണ്സ് നല്കി നാല് വിക്കറ്റ് വീഴ്ത്തിയാണ് കിംഗ്സ് ഇലവന് പഞ്ചാബിന്റെ ബാലാജി സണ്റൈസേഴ്സിനെ ഇരുട്ടിലാഴ്ത്തിയത്. 72 റണ്സിനായിരുന്നു കിംഗ്സ് ഇലവന് ഹൈദരാബാദ് സണ്റൈസേഴ്സിനെ കീഴടക്കിയത്. കിംഗ്സ് ഇലവന്റെ മൂന്നാം വിജയമാണിത്. ബാറ്റുകൊണ്ട് ഗ്ലെന് മാക്സ്വെല് വീണ്ടും വെടിക്കെട്ട് തീര്ത്ത പോരാട്ടത്തില് ആദ്യം ബാറ്റ് ചെയ്ത കിംഗ്സ് ഇലവന് 20 ഓവറില് ആറ് വിക്കറ്റ് നഷ്ടത്തില് 193 റണ്സെന്ന കൂറ്റന് സ്കോര് അടിച്ചെടുത്തു. 43 പന്തില് നിന്ന് 5 ഫോറും 9 സിക്സറുകളുമടക്കം മാക്സ്വെല് 95 റണ്സാണ് അടിച്ചുകൂട്ടിയത്. 35 റണ്സെടുത്ത ചേതേശ്വര് പൂജാരയും 30 റണ്സെടുത്ത സെവാഗും മികച്ച ബാറ്റിംഗ് കാഴ്ചവെച്ചു. മറുപടി ബാറ്റിംഗിനിറങ്ങിയ സണ്റൈസേഴ്സ് ഹൈദരാബാദ് 19.2 ഓവറില് 121 റണ്സിന് ഓള് ഔട്ടായി. 27 റണ്സെടുത്ത ലോകേഷ് രാഹുലാണ് ഹൈദരാബാദ് ടീമിന്റെ ടോപ് സ്കോറര്. കിംഗ്സ് ഇലവന് കളിച്ച മൂന്ന് മത്സരങ്ങളിലും ഗ്ലെന് മാക്സ്വെല്ലാണ് മാന് ഓഫ് ദി മാച്ച്.
പരാജയമറിയാത്ത കുതിപ്പാണ് കിംഗ്സ് ഇലവന് പഞ്ചാബ് ഈ സീസണില് നടത്തുന്നത്. അതേസമയം ഹൈദരാബാദ് സണ്റൈസേഴ്സിന് ഈ സീസണില് വിജയം വിട്ടുനില്ക്കുകയാണ്. കളിച്ച രണ്ട് മത്സരങ്ങളിലും അവര് പരാജയപ്പെട്ടു.
194 റണ്സ് വിജയലക്ഷ്യത്തെ പിന്തുടര്ന്ന് മറുപടി ബാറ്റിംഗിനിറങ്ങിയ ഹൈദരാബാദിന് മികച്ച തുടക്കം നല്കുന്നതില് ഓപ്പണര്മാര് പരാജയപ്പെട്ടു. 49 റണ്സെടുക്കുന്നതിനിടെ ക്യാപ്റ്റന് ശിഖര് ധവാന് (1), ഫിഞ്ച് (19), വാര്ണര് (8), വേണുഗോപാല് റാവു (11) എന്നിവരെ നഷ്ടമായതോടെ ഹൈദരാബാദ് പരാജയത്തെ നേരിട്ടു. പിന്നീട് ഇര്ഫാന് പഠാന് (5), ഡാരന് സമി (15), രാഹുല് (27) എന്നിവരും കൂടാരം കയറിയതോടെ ഹൈദരാബാദ് 95ന് ഏഴ് എന്ന നിലയിലേക്ക് കൂപ്പുകുത്തി. ഫിഞ്ച്, വാര്ണര്, സമി, സ്റ്റെയിന് എന്നിവരാണ് ബാലാജിയുടെ പന്തുകള്ക്ക് മുന്നില് വീണത്. ബാലാജിക്ക് പുറമെ മിച്ചല് ജോണ്സണും അക്ഷര് പട്ടേലും രണ്ട് വിക്കറ്റുകള് വീതവും വീഴ്ത്തി. കിംഗ്സ് ഇലവന് പഞ്ചാബിന്റെ അടുത്ത മത്സരം 26ന് കൊല്ക്കത്ത നൈറ്റ് റൈഡേഴ്സുമായാണ്. അബുദാബിയിലാണ് പോരാട്ടം.
