361. ദുഷ്ടകംസവധോദ്യക്തഃ
ദുഷ്ടനായ കംസനെവധിക്കാന് തുനിഞ്ഞവന്.
അധര്മികളെ നശിപ്പിച്ചു ധര്മം സംസ്ഥാപിക്കുന്നതിനായിരുന്നു വിഷ്ണുഭഗവാന് മനുഷ്യരൂപത്തില് അവതരിച്ചത്. ജനിച്ചയുടനെ തന്നെ അതിനുള്ള പരിശ്രമം ആരംഭിച്ചു. ബാലലീലയുടെ ഭാഗമായി നാം കണ്ട ദുഷ്ടനിഗ്രഹത്തില് താരതെമ്യേന നിസ്സാരരെയാണ് നശിപ്പിച്ചത്. ഇവര്ക്കെല്ലാം നേതൃത്വം കൊടുത്ത കംസനാണ് അടുത്തമുഖ്യലക്ഷ്യം. കംസവധത്തിനുള്ള ഒരുക്കങ്ങള് ഭഗവാന് ആരംഭിച്ചു. ഭഗവദിച്ഛയനുസരിച്ച് നാരദന് കംസനെ കണ്ട് ദേവകിയുടെ എട്ടാമത്തെ പുത്രനാണ് നന്ദഗോപരുടെ മകനായി അറിയപ്പെടുന്ന കൃഷ്ണനെന്ന സത്യം അറിയിച്ചു. ഈ സത്യം അറിഞ്ഞ കംസന് കൃഷ്ണനെ മഥുരയില് വരുത്തി വധിക്കാന് തീരുമാനിച്ചു. ഒരു ധനുര് യാഗം നടത്തുക. അതില് പങ്കെടുക്കാനെന്ന മട്ടില് നന്ദഗോപരെയും ബലരാമനെയും കൃഷ്ണനെയും വിളിച്ചുവരുത്തി രാമകൃഷ്ണരെ വധിക്കുക എന്നൊരു പദ്ധതി കംസന് കണ്ടെത്തി. അതു നടപ്പിലാക്കുന്നതിന് നന്ദഗോപരെയും മക്കളെയും ക്ഷണിക്കാനായി അക്രൂരനെ കംസന് വ്രജത്തിലേക്ക് അയച്ചു. തന്റെ മരണത്തിനുള്ള മുന്നൊരുക്കം കംസരെ കൊണ്ടുതന്നെ ചെയ്യിക്കുന്നു. യോഗമായയുടെ കൂടെ പ്രവര്ത്തനമാണിത്.
(തുടരും)
ഡോ. ബി.സി.ബാലകൃഷ്ണന്
പ്രതികരിക്കാൻ ഇവിടെ എഴുതുക: