150: വാമനഃ? -വാമനന്, പൊക്കം കുറഞ്ഞവന്, മുണ്ടന് എന്ന അര്ത്ഥത്തില് സാധാരണപ്രയോഗം. മഹാബലിയുടെ ബലം നശിപ്പിക്കാന് അദിതിയുടെയും കശ്യപന്റെയും മകനായി അവതരിച്ചപ്പോള് പൊക്കം കുറഞ്ഞ ഒരു ബ്രഹ്മചാരിയുടെ രൂപത്തിലാണ് ഭഗവാന് മഹാബലിയെ സന്ദര്ശിച്ചത്. ആ അവതാരത്തിന് വാമനാവതാരം എന്ന് പ്രസിദ്ധി.
വാമശബ്ദത്തിന് സുന്ദരം എന്നര്ത്ഥമുണ്ട്. വാമനന് എന്ന പദത്തിന് സുന്ദരന്, തേജസ്വി എന്നര്ത്ഥം. മഹാബലിയുടെ യാഗശാലയിലെത്തിയ ബ്രഹ്മചാരിയുടെ തേജസ്സും സൗന്ദര്യവും എല്ലാവരെയും ആകര്ഷിച്ചു.
വാമം എന്നതിന് ധനം എന്നും അര് ത്ഥമുണ്ട്. എല്ലാ സമ്പത്തിനെയും നയിക്കുന്നതിനാല് ഗുരുവായൂരപ്പനെ വാമനനെന്നും പറയാമെന്ന് ചില ആചാര്യന്മാര് വാദിക്കുന്നു. ലക്ഷ്മീകാന്തനായ ഭഗവാന്റെ ഇച്ഛാനുസാരമാണ് ലക്ഷ്മീകടാക്ഷം മനുഷ്യരില് സംപതിക്കുന്നത്.
വാമനം ഒരു ചികിത്സാരീതിയാണ്. ഉള്ളിലുള്ള രോഗകാരണങ്ങളായ മാലിന്യങ്ങളെ ഛര്ദ്ദിപ്പിക്കുന്ന ചികിത്സ. മനുഷ്യരുടെ ഉള്ളിലുള്ള അഹങ്കാരം, ക്രൗര്യം, ലോഭം തുടങ്ങിയ ദോഷങ്ങളെ വമിപ്പിക്കുന്ന ഭഗവാന് വാമനനാണ്. മഹാബലിയുടെ ധര്മനിഷ്ഠയെ ആദരിച്ചുകൊണ്ടുതന്നെ അദ്ദേഹത്തിന്റെ അഹങ്കാരത്തെ വമിപ്പിച്ചുശുദ്ധീകരിക്കുകയാണല്ലോ ഭഗവാന് ചെയ്തത്.
151. യാചകഃ – യാചകന്, പിച്ചക്കാരന്, വാമനാവതാരം പല വൈരുദ്ധ്യങ്ങളുടെ ഐക്യം ഉള്ക്കൊള്ളുന്നു. ബ്രഹ്മാണ്ഡകോടികള് ഉള്ളിലുള്ള ബൃഹദ് രൂപമാണ് ഭഗവാന്റേത്. ആ ഭഗവാന് കേവലം ഒരു വടുവായി രൂപം ധരിച്ചാണ് ബലിയെ തോല്പ്പിച്ചത്. മഹാബലി ഉള്പ്പെടെ ലോകത്തുള്ള ഏവര്ക്കും ആഗ്രഹങ്ങള് ഉണ്ടാക്കുന്നതും ആ ആഗ്രഹങ്ങളില് ചിലതെങ്കിലും നിറവേറ്റിക്കൊടുക്കുന്നതും ഭഗവാനാണ്. ആഭഗവാന് മഹാബലിയുടെ മുന്നില് യാചകനായി കൈനീട്ടി നില്ക്കുന്നു. യാചിക്കുന്നത് വെറും മൂന്നടി മണ്ണ്. ആ ഭഗവാന് യഥാര്ത്ഥത്തില് ആരെന്ന് രണ്ടക്ഷരം മാത്രമുള്ള അടുത്തനാമം വ്യക്തമാക്കുന്നു.
152. വിഭൂഃ – വിവിധ രൂപങ്ങളായി സ്വയം ഭവിക്കുന്നവന്, സര്വശക്തന്, എല്ലാത്തിനും നാഥന്, പ്രഭു എന്നിങ്ങനെ ഈ പദത്തിന് ബന്ധപ്പെട്ട പല അര്ത്ഥങ്ങളുണ്ട്. ലോകങ്ങളായും ബ്രഹ്മാണ്ഡങ്ങളായി ഭവിച്ച ഭഗവാന് മീനായും ആമയും പന്നിയായും ഒക്കെ കളിക്കുന്നത് നാം കണ്ടു. ഭൂതഭവ്യഭവത്പ്രഭുവായി വിഷ്ണുസഹസ്രനാമം ഭഗവാനെ വാഴ്ത്തുന്നു. വാമനനും യാചകനുമായി മഹാബലിയുടെ മുന്നിലെത്തിയ ഭഗവാന് സര്വാന്തര്യാമിയായ പരമാത്മാവാണെന്ന് മഹാബലി അറിഞ്ഞിരുന്നു.
പരംബ്രഹ്മ പരം ധാമ
പവിത്രം പരമം ഭഗവാന്
പുരുഷം ശാശ്വതം ദിവ്യമാദിദേവമജം വിഭും
ആഹുസ്ത്വാമൃഷയഃ
സര്വ്വേ……”
(പരമായ ബ്രഹ്മവും പരമായ ധാമവും ഏറ്റവും ശ്രേഷ്ഠമായ വസ്തുവും നിന്തിരുവടി തന്നെയാകുന്നു. നിന്തിരുവടിയെ ശാശ്വതനും ദിവ്യനും ആദിദേവനും ജന്മമില്ലാത്തവനും പുരുഷനും വിഭുവുമായി ഋഷിമാരും…. പറയുന്നു. ഭഗവത്ഗീത 10-12, 13) എന്ന് അര്ജ്ജുനന് ശ്രീകൃഷ്ണനോട് പറയുന്നത് ഈ സന്ദര്ഭത്തില് പ്രസക്തമാണ്. വടുവായി മഹാബലിയുടെ ദാനം സ്വീകരിച്ച ഭഗവാന് ത്രിവിക്രമനായി വളര്ന്ന വിഭുത്വത്തെ വാഴ്ത്താം.
(തുടരും)
ഡോ. ബി.സി.ബാലകൃഷ്ണന്
