പാരിസ്: പരസ്പരം പോരടിക്കുന്ന സംഘങ്ങള് ഫ്രാന്സില് പുതുവര്ഷത്തെ വരവേല്ക്കുന്നതു കാറുകള് കത്തിച്ച്. ഇതുമൂലം പുതുവര്ഷരാവില് ആളുകള് പുറത്തിറങ്ങിയത് ഭീതിയോടെ. എന്നാല്, ഈ പുതുവല്സര ദിനത്തില് പത്തു ശതമാനത്തോളം അക്രമം കുറഞ്ഞതായി ആഭ്യന്തരകാര്യമന്ത്രി മാനുവല് വാലസ്.
ഫ്രാന്സിന്റെപ്രാന്തപ്രദേശങ്ങളില് പുതുവര്ഷമെന്നാല് തീറ്റയും കുടിയും മാത്രമല്ല, മേന്പൊടിക്ക് അടിപിടിയുമുണ്ട്. കരുത്തുകാട്ടാനാണു ചില സംഘങ്ങള് കാറുകള് കത്തിക്കുന്നത്. ഈവര്ഷം 1067 കാറുകള് അഗ്നിക്കിരയായി. ഇതു പതിവിലും പത്തു ശതമാനം കുറവാണെന്നു മന്ത്രി പറഞ്ഞു. കത്തുന്ന കാറുകളുടെ കണക്കുകള് പ്രസിദ്ധപ്പെടുത്തിയപ്പോള് വിവിധ പ്രാദേശിക സംഘങ്ങള് ഇതൊരു അഭിമാനപ്രശ്നമായി കരുതി കൂടുതല് കാറുകള് കത്തിക്കാന് തുടങ്ങി.
കുടിപ്പക വര്ധിച്ചപ്പോള് എണ്ണം സര്ക്കാര് രഹസ്യമാക്കി വച്ചു. ഏറെക്കാലത്തിനു ശേഷം ഈവര്ഷം മുതല് വീണ്ടും കണക്കുകള് പുറത്തുവിട്ടപ്പോഴാണ് അക്രമം കുറഞ്ഞ കാര്യം മനസ്സിലായത്. രാജ്യമെങ്ങും ഏകദേശം 53,000 പൊലീസുകാര് കാവല് നിന്നിട്ടും ആഘോഷത്തിനിടെ കത്തിക്കുത്തില് രണ്ടുപേര് മരിച്ചു.
