തലശ്ശേരി: തലശ്ശേരി ക്രിക്കറ്റ് സ്റ്റേഡിയത്തില് 7 ന് ആരംഭിച്ച കേരള-ആന്ധ്ര രഞ്ജിട്രോഫി മത്സരം സമനിലയില് അവസാനിച്ചു. സഞ്ജു സാംസനാണ് മാന് ഓഫ് ദി മാച്ച്. 3 ന് 288 എന്ന നിലയില് ഇന്നലെ പുനരാരംഭിച്ച മത്സരത്തില് ഉച്ചയോടെ 431 റണ്സിന് ആന്ധ്ര ഓള് ഔട്ടാവുകയായിരുന്നു. തുടര്ന്ന് രണ്ടാം ഇന്നിംഗ്സ് ആരംഭിച്ച കേരളം 24 ഓവറില് കളി അവസാനിക്കുമ്പോള് 3 വിക്കറ്റ് നഷ്ടത്തില് 89 റണ്സ് നേടിയിരുന്നു. ഇതില് സഞ്ജു സാംസന് നേടിയ അര്ധ സെഞ്ച്വറി കാണികള്ക്ക് മനോഹരമായ വിരുന്നായി മാറി. നേരത്തെ ഒന്നാം ഇന്നിങ്ങ്സില് സഞ്ജു സെഞ്ചറി(115) നേടിയിരുന്നു. രണ്ടാം ഇന്നിംഗ്സില് 51 റണ്സുമായി സഞ്ജുവും 7 റണ്സുമായി പി.പ്രശാന്തും മുന്നേറവേയാണ് കളി സമാപിച്ചത്.
ആസാമിനെതിരെ നടന്ന മത്സരത്തില് സഞ്ജു ഡബിള് സെഞ്ച്വറി നേടിയിട്ടുണ്ട്. ഇന്നലെ കളിച്ചവരില് ജഗദീഷ്(4), നിഖിലേഷ്(12), വിനു മനോഹരന്(13) എന്നിവരുടെ വിക്കറ്റുകളാണ് നഷ്ടപ്പെട്ടത്.
കേരളത്തിന് ഈ കളിയില് 3 പോയന്റും ആന്ധ്രക്ക് 1 പോയന്റുമാണ് ലഭിച്ചത്. കേരളത്തിന് ഇപ്പോള് ആകെ ആറു പോയന്റാണുള്ളത്. 14 മുതല് 17 വരെ കേരളവും ഗോവയുമാണ് തലശ്ശേരിയില് കളിക്കുന്നത്.
എം.പി.ഗോപാലകൃഷ്ണന്
