കൊച്ചി: തലയില്‍ തറച്ചുകയറിയ ആണി ശസ്ത്രക്രിയയിലൂടെ വിജയകരമായി പുറത്തെടുത്തു. അമ്യത ആശുപത്രിയിലെ ന്യൂറോ സര്‍ജറി വിഭാഗത്തിലെ ഡോക്ടര്‍മാരാണ്‌ ഈ അപൂര്‍വ്വ ശസ്ത്രക്രിയ വിജയകരമായി നടത്തിയത്‌.
23 വയസ്സുള്ള ഇന്ത്യന്‍ യുവാവായ രോഗി സൗദി അറേബ്യയിലെ റിയാദില്‍ കണ്‍സ്ട്രക്ഷന്‍ കമ്പനിയില്‍ ജോലി ചെയ്തു വരികയായിരുന്നു. നെയില്‍ ഗണ്‍ ഉപയോഗിച്ച്‌ മെറ്റല്‍ ഷീറ്റ്‌ കൂട്ടിച്ചേര്‍ക്കുന്നതിനിടയില്‍ ഉന്നംതെറ്റിയ ആണി കോണ്‍ക്രീറ്റ്‌ പോസ്റ്റില്‍ തട്ടി തിരിച്ച്‌ രോഗിയുടെഇടത്തേകവിളിലൂടെ തറച്ചു തലയില്‍ കയറുകയായിരുന്നു.രോഗിയെ ഉടനെതന്നെ റിയാദിലെ ആശുപത്രിയില്‍ എത്തിക്കുകയും തലയുടെ എക്സറെ എടുക്കുകയും ചെയ്തു. തലയുടെ ഇടതുഭാഗത്തിലെ പ്രധന രക്ത ധമനിയ്‌ക്ക്‌ പരിക്കുപറ്റിയ നിലയില്‍ ആണി തറച്ചിരുന്നതായിട്ടാണ്‌ എക്സറെയില്‍ തെളിഞ്ഞിരുന്നത്‌. റിയാദില്‍ പ്രഥമ ശുശ്രൂഷ നല്‍കിയ ശേഷം രോഗിയെ വിദഗ്‌ദ്ധ ചികിത്സയ്‌ക്കായി കൊച്ചിയിലെ അമ്യത ഇന്‍സ്റ്റിറ്റിയൂട്ട്‌ ഓഫ്‌ മെഡിക്കല്‍ സയന്‍സസില്‍ എത്തിക്കുകയായിരുന്നു
ആശുപത്രിയില്‍ എത്തുമ്പോള്‍ രോഗിക്ക്‌ ബോധം ഉണ്ടായിരുന്നു. വലതുഭാഗത്തെ കാലിനും കൈയ്‌ക്കും ചെറിയ രീതിയില്‍ ചലന ശേഷി നഷ്ടപ്പെട്ടിരുന്നു. എന്നാല്‍ രോഗിയുടെ ഇടതു കണ്ണ്‌ ചലിപ്പിക്കാന്‍ പറ്റാത്ത അവസ്ഥയിലായിരുന്നു.അമ്യത ആശുപത്രിയില്‍ എത്തുമ്പോള്‍ രോഗിയുടെ ആണി തുളഞ്ഞു കയറിയ ഇടതു കവിളിലെ മുറിവ്‌ ചെറുതും തീരെ കാണാന്‍ പറ്റാത്ത അവസ്ഥയിലുള്ളതുമായിരുന്നു.
തലച്ചോറിലെ പ്രധാന രക്തധമനിക്കു മുറിവുണ്ടാക്കുന്ന വിധത്തില്‍ തലയോട്ടിയിലൂടെ ആഴത്തില്‍ മുറിവുണ്ടാക്കികൊണ്ട്‌ ധമനിയുടെ തൊട്ടടുത്ത്‌ ഇരിക്കുന്നതായിട്ട്‌ സിറ്റി സ്കാനിങ്ങിലും ആഞ്ചിയോഗ്രാഫിയിലും കാണിച്ചിരുന്നത്‌. അകത്തുപ്പെട്ടുപോയ ആണിയെ പുറത്തെടുക്കുന്നതിനായി ന്യൂറോ നാവിഗേഷന്‍ സാങ്കേതിക വിദ്യയിലൂടെ അതിസൂക്ഷ്മമായ മൈക്രോ സര്‍ജിക്കല്‍ ഓപ്പറേഷനാണ്‌ രോഗിയില്‍ നടത്തിയത്‌. ഞരമ്പിനും, പ്രധാന രക്തധമനിയ്‌ക്കും മുറിവുകളൊന്നും ഏല്‍ക്കാതെ പ്രത്യേകം സൂക്ഷ്മമായിട്ടാണ്‌ ആണി പുറത്തെടുത്തത്‌. ശസ്ത്രക്രിയയ്‌ക്കു ശേഷം രോഗി ക്രമേണ സുഖം പ്രാപിച്ചു. ഒരാഴ്‌ച്ചയ്‌ക്കു ശേഷം ആശുപത്രിയില്‍ നിന്നും ഡിസ്ചാര്‍ജ്‌ ചെയ്യുകയും ചെയ്തു. വലതുഭാഗത്തെ കൈകാലുകളുടെ ചലനശേഷിയും ക്രമേണ തിരിച്ചു കിട്ടുകയും ചെയ്തു. ഇടതുകണ്ണിന്റെ ചലനശേഷി വീണ്ടെടുത്തു വരുന്നു.
ഇതുപോലുള്ള നെയില്‍ ഗണ്ണുകള്‍ കണ്‍സ്ട്രക്ഷന്‍ കമ്പനികള്‍ വ്യാപകമായി ഉപയോഗിച്ചു കൊണ്ടിരിക്കുന്നു. . എന്നാല്‍ ഇത്തരം ഉയര്‍ന്ന പവറുള്ള മെഷീനുകള്‍ ഉപയോഗിക്കുമ്പോള്‍അത്യാവശ്യം വേണ്ട സുരക്ഷാ ഉപകരണങ്ങളുടെ പ്രാധാന്യമാണ്‌ ഇത്തരം സംഭവങ്ങള്‍എടുത്തുകാട്ടുന്നത്‌. ഈ രോഗിക്ക്‌ ആവശ്യത്തിനുള്ള സുരക്ഷാ ഉപകരണങ്ങള്‍ കൊടുത്തിരുന്നുവെങ്കില്‍ ഈ അപകടം തീര്‍ത്തും ഒഴിവാക്കാമായിരുന്നു.
അമ്യത ഇന്‍സ്റ്റിറ്റിയൂട്ട്‌ ഓഫ്‌ മെഡിക്കല്‍ സയന്‍സസിലെ ന്യൂറോ സര്‍ജറി വിഭാഗം മേധാവി ഡോ: ദിലീപ്‌ പണിക്കര്‍, ന്യൂറോ സര്‍ജറി വിഭാഗം ഡോക്ടര്‍ ഡോ:പരശു രാമന്‍, അനസ്തേഷ്യ വിഭാഗത്തിലെ ഡോ: ഗോകുല്‍ദാസ്‌, ഡോ:ജിതേന്ദ്ര, റേഡിയോളജി വിഭാഗത്തിലെ ഡോ: ശ്രീകാന്ത്‌ മൂര്‍ത്തി എന്നിവരുടെ നേത്യത്വത്തിലാണ്‌ ശസ്ത്രക്രിയ പൂര്‍ത്തിയാക്കിയത്‌.
