മട്ടാഞ്ചേരി: നവരാത്രി ആഘോഷം കൊച്ചിക്ക്‌ വൈവിധ്യതയുടെ ആഘോഷദിനരാത്രങ്ങളാണ്‌. നാനാത്വത്തിലെ ഏകത്വ സന്ദേശവുമായി ഭാരതത്തിലെ ദക്ഷിണ-ഉത്തര-പൂര്‍വ ദേശങ്ങളിലെ ആഘോഷങ്ങള്‍ കൊച്ചിയുടെ നവരാത്രി ദിനങ്ങളില്‍ പ്രകടമാകും. ബൊമ്മകോലവും ദസറയും രാമലീലയും ദുര്‍ഗ്ഗാപൂജയും ഭാണ്ഡിയനൃത്തവും സുമംഗലി-കന്യകാപൂജയും പുസ്തക-ആയുധപൂജയും ദേവീദര്‍ശനപൂജയുമെല്ലാം കൊച്ചിയിലെ നവരാത്രി ദിനരാത്രങ്ങളെ ആഘോഷതിമിര്‍പ്പിലാക്കും. തമിഴ്‌ ബ്രാഹ്മണരും കോംഗ്കണി വിഭാഗക്കാരും ആന്ധ്രക്കാരും ഗുജറാത്തികളും മറാഠികളും ബംഗാളികളും കന്നഡക്കാരും മലയാളികളുമെല്ലാം നവരാത്രി ദിനങ്ങളില്‍ പൂജാദി-ആഘോഷങ്ങളില്‍ മുഴുകുമ്പോള്‍ മറുനാട്ടില്‍നിന്നെത്തുന്ന സഞ്ചാരികള്‍ക്ക്‌ കൊച്ചിയില്‍ ഭാരതദേശത്തെ നവരാത്രി ദിനാഘോഷത്തെ നേരില്‍ കാണാനാകുന്നു.
സാമൂഹിക-സാംസ്കാരിക-ആത്മീയ സന്ദേങ്ങളുമായുള്ള നവരാത്രി ആഘോഷം കൊച്ചിയുടെ സവിശേഷ ഉത്സവമാണ്‌. പാലസ്‌ റോഡ്‌, ചെറളായി, അമരാവതി, തുണ്ടിപ്പറമ്പ്‌ എന്നിവിടങ്ങളിലായി തമിഴ്‌ ബ്രാഹ്മണര്‍, വൈശ്യര്‍, കുഡുംബികള്‍, സാരസ്വതര്‍ തുടങ്ങിയ കോംഗ്കണി സമൂഹങ്ങളും കര്‍ണാടക ദേശക്കാരും വീടുകളില്‍ ബൊമ്മക്കൊലുകള്‍ അലങ്കരിച്ച്‌, ബന്ധുമിത്രാദികളെ ക്ഷണിച്ച്‌ സുമംഗലികളെ ‘അഷ്ടോമാംഗല്യം’ നല്‍കി ആദരിച്ചും, കന്യകമാരെ ‘കുമാരിപൂജ’ ചെയ്തും ഭജനകീര്‍ത്തനങ്ങളുമായാണ്‌ നവരാത്രി ആഘോഷം കൊണ്ടാടുന്നത്‌. കലിയുഗവരദനായ തിരുപ്പതി ശ്രീ വെങ്കിടാചലപതി ദേവരുടെ ബ്രഹ്മോത്സവത്തെ അനുസ്മരിച്ച്‌ ദേവന്‌ കാണിക്ക സമര്‍പ്പണവും നടക്കും.
ഗുജറാത്തി റോഡിലെ ശേര്‍വാ മഹാജനവാടി കേന്ദ്രീകരിച്ചാണ്‌ കന്നഡ സമൂഹത്തിന്റെ നവരാത്രി ആഘോഷം. സന്ധ്യപൂജക്കുശേഷം രാത്രി നടക്കുന്ന ‘ദേവീദര്‍ശനം’ (വെളിച്ചപ്പാട്‌ തുള്ളലിന്‌ സമാനമായത്‌) ഇവിടെ വിശേഷാല്‍ ചടങ്ങാണ്‌. സാമൂദ്രിമാതാമന്ദിരത്തിലെ ദുര്‍ഗ്ഗാപ്രതിഷ്ഠക്ക്‌ മുന്നില്‍ ദുര്‍ഗാസ്തുതികള്‍ പാടിയും ആടിയുമാണ്‌ വടക്കേയിന്ത്യക്കാര്‍ ദുര്‍ഗാപൂജ നടത്തുന്നത്‌. ഗുജറാത്തി-മാര്‍വാടി സമൂഹങ്ങള്‍ ദരിയസ്ഥാന്‍-മണികേശ്വര്‍-രാംമന്ദിര്‍ ക്ഷേത്രങ്ങള്‍ കേന്ദ്രീകരിച്ച്‌ രാത്രിയെ പകലാക്കി ശ്രീകൃഷ്ണ-ദര്‍ഭരസ്സക്‌ നൃത്തലഹരിയിലമരും. ക്ഷേത്രങ്ങളും സാംസ്കാരികന്ദ്രേങ്ങളും കേന്ദ്രീകരിച്ച്‌ സംഗീത-നൃത്ത-വാദ്യ കലാപ്രകടനങ്ങളും പുസ്തക-ആയുധപൂജയമാണ്‌ മലയാളക്കരയില്‍ നവരാത്രി നടക്കുന്നത്‌. ത്രീശക്തി ദേവതാ ഉപാസനയില്‍ ആത്മീയ-സാംസ്കാരിക ആഘോഷമായി മാറുന്ന നവരാത്രി ദിനങ്ങള്‍ കൊച്ചിയിലെ നാനാത്വത്തിലെ ഏകത്വ ആഘോഷമായണ്‌ ശ്രദ്ധേയമാകുന്നത്‌. ഭവനങ്ങളും സാംസ്കരിക സാമൂഹ്യ സംഘടനാ കേന്ദ്രങ്ങളും ക്ഷേത്രങ്ങളുമെല്ലാം വൈവിധ്യതയുടെ ആചാര -അനുഷ്ഠാന-പാരമ്പര്യ ശൈലികളുമായി നവരാത്രി ആഘോഷപൂജയിലമര്‍ന്നുകഴിഞ്ഞു.
എസ്. കൃഷ്ണകുമാര്‍
