കൊച്ചി: എറണാകുളം ജില്ലയില്‍ പനി പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കാന്‍ എ.ഡി.എം ബി. രാമചന്ദ്രന്റെ അധ്യക്ഷതയില്‍ ചേര്‍ന്ന അവലോകന യോഗം തീരുമാനിച്ചു.
ഡെങ്കിപ്പനി പരത്തുന്നത്‌ ഈഡിസ്‌ വിഭാഗത്തില്‍പെടുന്ന കൊതുകുകളാണ്‌. ശുദ്ധ ജലത്തില്‍ മാത്രം വളരുന്ന ഇവ പ്രധാനമായും ചിരട്ട, ടയര്‍, കരിക്കിന്‍ തൊണ്ട്‌, ടെറസ്സ്‌, വീടുകളുടെ പാരപ്പറ്റ്‌, ഉടഞ്ഞ മണ്‍, ഗ്ലാസ്‌, പാത്രങ്ങള്‍, ടിന്‍, പ്ലാസ്റ്റിക്‌ മുതലായവയിലാണ്‌ പ്രജനനം നടത്തുന്നത്‌. ഇത്തരം ഉറവിടങ്ങള്‍ നശിപ്പിക്കുക എന്നതുമാത്രമാണ്‌ ഡങ്കി പനി തടയുന്നതി0നുള്ള ഏക മാര്‍ഗം. ആരോഗ്യ വകുപ്പ്‌ ജീവനക്കാരുടേയോ സ്വയംഭരണ സ്ഥാപനങ്ങളുടേയോ മാത്രം പ്രവര്‍ത്തനങ്ങള്‍ കൊണ്ട്‌ മാത്രം ഈ രോഗത്തെ ഫലപ്രദമായി ചെറുക്കുവാന്‍സാധിക്കില്ലെന്നും ജനങ്ങള്‍ ജാഗ്രത പുലര്‍ത്തണമെന്നും എ.ഡി.എം നിര്‍ദേശിച്ചു.
പകല്‍ മാത്രം കടിക്കുന്ന കൊതുകുകളായതിനാല്‍ പുലര്‍ച്ചെയും വൈകുന്നേരങ്ങളിലും കൊതുകുകടി ഏല്‍ക്കാതിരിക്കാന്‍ ശ്രദ്ധിക്കണം. വീടിനു ചുറ്റും കിടക്കുന്ന ചിരട്ട , കുപ്പി, പ്ലാസ്റ്റിക്‌, ടിന്നുകള്‍, ടയറുകള്‍ എന്നിവ നീക്കം ചെയ്യാനും, പനി വന്നാല്‍ സ്വയം ചികിത്സിക്കാതെ ആശുപത്രികളെ സമീപിക്കാനും ബോധവല്‍ക്കരണം നടത്തുമെന്ന്‌ എ.ഡി.എം പറഞ്ഞു.
