ന്യൂദല്ഹി: കഴിഞ്ഞ ഒന്പതു മാസത്തിനിടെ രാഷ്ട്രപതി പ്രണബ് മുഖര്ജി തള്ളിയത് ഒന്പതു ദയാഹര്ജികള്. ദയയില്ലാത്ത രാഷ്ട്രപതിയെന്ന വിശേഷണം പ്രണബ് മുഖര്ജിക്ക് ലഭിക്കുമോ. മുംബൈ ഭീകരാക്രമണക്കേസില് വധശിക്ഷക്ക് വിധിക്കപ്പെട്ട അജ്മല് കസബിന്റെ ദയാഹര്ജിയാണ് രാഷ്ട്രപതിയായതിന് ശേഷം പ്രണബ് ആദ്യം തള്ളിയത്. കോടതി വധശിക്ഷ വിധിച്ച ഒരു സ്ത്രീയുടെ ദയാഹര്ജിയും പ്രണബ് തള്ളിയിരുന്നു. മുന് രാഷ്ട്രപതി ശങ്കര് ദയാല് ശര്മ്മ തന്റെ അധികാരവേളയില് പതിന്നാല് ദയാഹര്ജികളാണ് തള്ളിയത്. എന്നാല് മുന് രാഷ്ട്രപതി കെ.ആര്.നാരായണന് ഒരു ഹര്ജി പോലും തള്ളിയിട്ടില്ല. മുന്രാഷ്ട്രപതിമാരായ അബ്ദുല്കലാം ഒരു ഹര്ജിയും പ്രതിഭാ പാട്ടീല് രണ്ട് ഹര്ജിയും മാത്രമാണ് തള്ളിയത്.
2013 ജനുവരി നാലിന് സായിബന്ന നിംഗപ്പ നടികര്, ഫെബ്രുവരി മൂന്നിന് പാര്ലമെന്റ് ആക്രമണക്കേസിലെ പ്രതി അഫ്സല് ഗുരു എന്നിവരുടെ ദയാഹര്ജിയും പ്രണബ് തള്ളി. ഈ വര്ഷം ഫെബ്രുവരിക്കും മാര്ച്ചിനുമിടയില് പ്രണബ് വീരപ്പന്റെ സഹായികളായ നാല് പേരുടെ ദയാഹര്ജികള് തള്ളിയിരുന്നു. സ്വന്തം കുടുംബത്തിലെ എട്ടു പേരെ കൊന്ന കേസിലെ പ്രതികളായ സഞ്ചീവ്, സോണീയ എന്നിവരുടെ ഹര്ജികളാണ് രാഷ്ട്രപതി ഏറ്റവും ഒടുവില് തള്ളിയത്.
മുംബൈ ആക്രമണക്കേസിലെ പ്രതി അജ്മല് കസബിന്റെ വധശിക്ഷ നടപ്പാക്കിയതോടെയാണ് രാജ്യത്ത് ഒരിടവേളക്ക് ശേഷം വധശിക്ഷ വീണ്ടും നടപ്പാക്കി തുടങ്ങിയത്. രാഷ്ട്രപതി പ്രണബ് മുഖര്ജി അടിയന്തര പ്രാധാന്യത്തോടെയാണ് കസബിന്റെ ദയാഹര്ജി പരിഗണിച്ചത്. കസബിന്റെ വധശിക്ഷ നടപ്പാക്കിയതിന് ശേഷമാണ് ഇക്കാര്യം പുറത്തുവിട്ടത്. ഇതിന് മുമ്പ് 2004 ലാണ് വധശിക്ഷ നടപ്പാക്കിയത്. ബലാത്സംഗക്കേസിലെ പ്രതിയായ ധനഞ്ജയ് ചാറ്റര്ജിയുടെ ദയാഹര്ജി അന്ന് രാഷ്ട്രപതിയായിരുന്ന ഡോ.അബ്ദുല് കലാമാണ് തള്ളിയത്.
ഇന്ത്യന് ഭരണഘടനയുടെ 72 ാം വകുപ്പാണ് വധശിക്ഷയില് തീരുമാനമെടുക്കാന് രാഷ്ട്രപതിക്ക് വിവേചനാധികാരം നല്കുന്നത്. ഇത്പ്രകാരം ശിക്ഷയില് ഇളവ് വരുത്താനോ ഹര്ജി തള്ളാനോ രാഷ്ട്രപതിക്ക് കഴിയും. ആവശ്യമെങ്കില് ആഭ്യന്തരമന്ത്രാലയത്തിന്റെയും മന്ത്രിസഭയുടെയും ഉപദേശം രാഷ്ട്രപതിക്ക് സ്വീകരിക്കാം. മുന്രാഷ്ട്രപതി കെ.ആര്.നാരായണന് മുന്നില് പത്ത് ദയാഹര്ജികള് എത്തിയെങ്കിലും ഒന്നുപോലും അദ്ദേഹം നിരസിച്ചില്ല. കെ.ആര്.നാരായണന് ശേഷമെത്തിയ അബ്ദുല്കലാമിന് മുന്നിലെത്തിയ ഹര്ജികളില് രണ്ടെണ്ണം അദ്ദേഹം തള്ളുകയുമായിരുന്നു. വിവരാവകാശ നിയമപ്രകാരമാണ് ഈ വിവരങ്ങള് പുറത്തു വന്നത്. രാജ്യത്തെ ആദ്യവനിതാ രാഷ്ട്രപതിയായ പ്രതിഭാപാട്ടില് മൂന്ന് ഹര്ജികളാണ് നിരസിച്ചിട്ടുള്ളത്.
