ലാപാസ്‌: ബൊളീവിയക്കെതിരായ സൗഹൃദ മത്സരത്തില്‍ ബ്രസീലിന്‌ മികച്ച വിജയം. മറുപടിയില്ലാത്ത നാല്‌ ഗോളുകള്‍ക്കാണ്‌ ബ്രസീല്‍ ബൊളീവിയയെ കീഴടക്കിയത്‌. യുവ സൂപ്പര്‍താരം നെയ്മര്‍ നേടിയ രണ്ട്‌ ഗോളുകളുടെ കരുത്തിലാണ്‌ കാനറികള്‍ മികച്ച വിജയം സ്വന്തമാക്കിയത്‌.
ഡിസംബറില്‍ ലൂയി ഫിലിപ്പ്‌ സ്കൊളാരി പരിശീലകചുമതല ഏറ്റെടുത്തശേഷം ബ്രസീല്‍ നേടുന്ന ആദ്യ വിജയമാണിത്‌. മൂന്നുഗോളുകള്‍ക്ക്‌ വഴിയൊരുക്കിയ റൊണാള്‍ഡീഞ്ഞോയായിരുന്നു മല്‍സരത്തിലെ താരം. കഴിഞ്ഞമാസം ലിബര്‍ട്ടഡോറസ്‌ കപ്പിനിടെ തീപ്പൊള്ളലേറ്റു കൊല്ലപ്പെട്ട പതിനാലുകാരനായ ആരാധകന്റെ കുടുംബത്തെ സഹായിക്കാനാണ്‌ മത്സരം നടത്തിയത്‌.
മത്സരത്തിന്റെ മൂന്നാം മിനിറ്റില്‍ ലിയനാര്‍ഡോ ഡാമിയോയാണ്‌ ബ്രസീലിന്റെ ആദ്യഗോള്‍ നേടിയത്‌. പിന്നീട്‌ 30, 41 മിനിറ്റുകളില്‍ നെയ്മറും ഇഞ്ച്വറി സമയത്ത്‌ ലിയനാര്‍ഡോയുമാണ്‌ ബ്രസീലിന്റെ ഗോളുകള്‍ നേടിയത്‌.
പ്രതികരിക്കാൻ ഇവിടെ എഴുതുക: