എരുമേലി: ഗ്രാമപഞ്ചായത്തിന്റെ സമഗ്രമായ വികസന പദ്ധതികളുടെ ഗൗരവമായി തയ്യാറാക്കേണ്ടുന്ന രേഖകള് പുതിയതായി ജോലിക്ക് വന്ന എല്ഡി ക്ലര്ക്കിനെ ‘പണി’ ഏല്പിച്ച് ഉത്തരവാദിത്വത്തില് നിന്നും രക്ഷപെടാനുള്ള പഞ്ചായത്ത് ഭരണസമിതിയുടെ നീക്കം വിവാദത്തിലേക്ക്.
സമയബന്ധിതമായി തയ്യാറാക്കുന്ന വികസന പദ്ധതി രേഖകള് ഡിപിസിയില് സമര്പ്പിച്ച് അംഗീകാരം നേടുന്നതിനും കരട് രേഖ തയ്യാറാക്കി ഗ്രാമസഭകളില് ചര്ച്ച ചെയ്ത് അംഗീകാരം നേടുന്നതടക്കമുള്ള കാര്യങ്ങള് ചെയ്യണമെന്നിരിക്കേയാണ് വിവാദം ഉയര്ന്നത്. പഞ്ചായത്തിന്റെ വികസന പദ്ധതിരേഖകള് സാധാരണഗതിയില് പഞ്ചായത്തിലെ സീനിയര് ജീവനക്കാരനെയോ യു.ഡി ക്ലര്ക്കിനെയൊ ആണ് ഏല്പിക്കുക. എരുമേലി ഗ്രാമപഞ്ചായത്തില് ജീവനക്കാരില് ഭൂരിപക്ഷം പേരും പരിചയക്കുറവുള്ളവരുമാണ്.
വികസനപദ്ധതി രേഖകള് തയ്യാറാക്കി ഗ്രാമസഭാ ചര്ച്ചകളും ഡിപിസി അംഗീകാരം നേടുന്നതിലും ഏതെങ്കിലും വിധത്തില് ഇനി തടസ്സമുണ്ടായാല് പുതുതായി ജോലിക്ക് വന്ന എല്.ഡി ക്ലര്ക്കിന്റെ തലയില് വച്ച് കെട്ടാനുള്ള നീക്കമാണ് നടക്കുന്നതെന്നും ജീവനക്കാരും പറയുന്നു. പഞ്ചായത്തിലെ തര്ക്കങ്ങളും കൂട്ടുത്തരവാദിത്വമില്ലായ്മയുമാണ് ഭരണപ്രതിസന്ധിക്ക് കാരണമെന്നും പറയുന്നു. ശബരിമല തീര്ത്ഥാടനം ആരംഭിക്കാന് ഒരു മാസം മാത്രം ബാക്കി നില്ക്കേ പഞ്ചായത്തിന്റെ പ്രവര്ത്തന മികവ് കൂടി കണക്കിലെടുക്കുന്ന സമയമാണിത്.
ഇന്ന് നടക്കുന്ന പഞ്ചായത്ത് വര്ക്കിംഗ് ഗ്രൂപ്പ് വികസന കമ്മറ്റിയോഗത്തില് പദ്ധതി രേഖയുടെ കരട് അവതരിപ്പിക്കുമെന്നാണ് കഴിഞ്ഞ ദിവസം പഞ്ചായത്ത് സെക്രട്ടറി എസ്. സുരേഷ് പറഞ്ഞത്. പക്ഷേ മുന് വര്ഷത്തെ രേഖ പദ്ധതിരേഖയാക്കി വായിക്കാനുള്ള നീക്കമാണെന്നും പഞ്ചായത്തംഗങ്ങള് പറയുന്നു.
