കൊൽക്കത്ത: പ്രധാനമന്ത്രി മുന്നോട്ടുവെച്ച ‘അമ്മയ്ക്ക് ഒരു മരം’ പദ്ധതി വംഗനാട്ടിൽ ജനകീയമാക്കാനുള്ള ദൗത്യത്തിന് രാജ്ഭവനിൽ തുടക്കം കുറിച്ച് ഗവർണർ പദവിയിൽ സിവി ആനന്ദബോസ് മൂന്നാം വർഷത്തിലേക്ക്. രാജ്ഭവൻ പൂന്തോട്ടത്തിൽ വൃക്ഷത്തൈകൾ നട്ടുപിടിപ്പിച്ചാണ് ശനിയാഴ്ച ഗവർണർ രണ്ടാം വാർഷികദിനാചരണം ഉദ്ഘാടനം ചെയ്തത്.
‘ഹരിതാഭമായ നാളെയിലേക്കുള്ള ഒരു ചുവടുവെപ്പ്’ എന്ന ലക്ഷ്യത്തോടെ പ്രധാനമന്ത്രിആവിഷ്കരിച്ച ‘ഏക് പെദ് മാ കേ നാം’ ദൗത്യ’ത്തിന്റെ ഭാഗമായി കുട്ടികൾക്കും വിശിഷ്ട വ്യക്തികൾക്കും ഗവർണർ വൃക്ഷത്തൈകൾ വിതരണം ചെയ്തു. തുടർന്ന് രാജ്ഭവനിൽ നടന്ന ചടങ്ങിൽ, ഭിന്നശേഷിക്കാർക്ക് കൃത്രിമ കൈകാലുകൾ വിതരണം ചെയ്തു.
‘അപ്‌നാ ഭാരത് – ജഗ്‌ത ബംഗാൾ’ എന്ന പേരിൽ വംഗനാടിന് ഉണർവേകുന്ന നിരവധി നൂതന സർഗാത്മക – ക്രിയാത്മക സംരംഭങ്ങൾക്കും ഗവർണർ ശനിയാഴ്ച രാജ്ഭവനിൽ നടന്ന വർണാഭമായ ചടങ്ങിൽ തുടക്കം കുറിച്ചു. 2022 നവംബർ 23 നാണ് ആനന്ദബോസ് ഗവർണറായി സത്യപ്രതിജ്ഞ ചെയ്തത്.
ഇന്ത്യൻ മ്യൂസിയവും വിക്ടോറിയ മെമ്മോറിയൽ ഹാളും ചേർന്ന് അവതരിപ്പിച്ച ‘ജനകീയ ഗവർണർ: പശ്ചിമ ബംഗാളിന്റെ ഹൃദയത്തിലേക്കുള്ള ഒരു യാത്ര, എന്ന പ്രദർശനം, സ്‌കൂൾ വിദ്യാർത്ഥികൾ പങ്കെടുത്ത ‘അപ്‌ന ഭാരത് ജഗ്‌ത ബംഗാൾ’ എന്ന വിഷയത്തിൽ ‘പെയിൻ്റിംഗ് ഫിയസ്റ്റ’, ഗവർണർ എഴുതിയ രണ്ടു പുസ്തകങ്ങളുടെ പ്രകാശനം, കവിതകളുടെ സംഗീത- നൃത്താവിഷ്കാരം എന്നിവയായിരുന്നു മറ്റുപരിപാടികൾ.
പ്രശസ്ത നർത്തകി മമത ശങ്കർ, കവി തമാൽ ലാഹ, രബീന്ദ്ര ഭാരതി സർവ്വകലാശാലയുടെ മുൻ ഡീനും പ്രമുഖ നർത്തകിയുമായ ഡോ. അമിതാ ദത്ത, ഏഷ്യാറ്റിക് സൊസൈറ്റി മുൻ പ്രസിഡൻ്റ് പ്രൊഫ.സ്വപൻ പ്രമാണിക്, ഇൻഡസ് വാലി വേൾഡ് സ്‌കൂൾ ഉപദേശകൻ ഡോ സുമൻ സൂദ് എന്നിവർ വിശിഷ്ടാതിഥികളായി പങ്കെടുത്തു.
ചുമതലയേറ്റപ്പോൾതന്നെ രാജ്ഭവന് ‘ജൻരാജ്ഭവൻ’ എന്ന പുതിയ മുഖം നൽകി തുടങ്ങിവെച്ച ജനകീയ പരിപാടികളുടെയും ഒന്നാം വാർഷികത്തിൽ ആവിഷ്കരിച്ച നൂതനപദ്ധതികളുടെയും തുടർച്ചയാണ് സംസ്ഥാനത്തിന്റെ സുസ്ഥിരവികസനത്തിനുതകുന്ന ജി -3 – ‘അപ്‌നാ ഭാരത് – ജഗ്‌ത ബംഗാൾ’.
സ്ത്രീ ശാക്തീകരണം, കുട്ടികളുടെ സുരക്ഷ, സമാധാനപരിപാലനം, യുവാക്കളുടെ പങ്കാളിത്തം, സാംസ്കാരിക – വിദ്യാഭ്യാസ പരിപോഷണം എന്നിവയ്‌ക്കുള്ള സംരംഭങ്ങൾക്കൊപ്പം മനുഷ്യക്കടത്തിനും മയക്കുമരുന്ന് ദുരുപയോഗത്തിനെതിരായ പ്രവർത്തനങ്ങൾക്കും ഈ പരിപാടികളിൽ മുൻ‌തൂക്കം നൽകും.
പ്രതികരിക്കാൻ ഇവിടെ എഴുതുക: