കോട്ടയം: അന്‍വറിനെ പൊടുന്നനെ ഇടതുമുന്നണിയില്‍ നിന്ന് പുറത്താക്കാന്‍ സിപിഎം മുതിരുമെന്ന് പ്രതീക്ഷിക്കാന്‍ വയ്യ. മലപ്പുറം ജില്ലയില്‍ നിന്നുള്ള മുസ്ലിം സമുദായ നേതാവ് എന്നതാണ് ഈ മൃദുസമീപനത്തിന് പിന്നില്‍.നിലവില്‍ പാളയത്തില്‍ പടയുയര്‍ത്തി വീര പരിവേഷത്തോടെ നില്‍ക്കുന്ന അന്‍വറിനെ പുറത്താക്കുന്നത് അണികളില്‍ സംശയത്തിനിടയാക്കുമെന്നും തീവ്ര മുസ്ലിം വിഭാഗങ്ങളില്‍ വലിയതോതില്‍ അതൃപ്തി ഉണ്ടാക്കുമെന്നും പാര്‍ട്ടി വിലയിരുത്തുന്നു. സജീവമല്ലാത്ത പാലോളി മുഹമ്മദ് കുട്ടിക്കും ടി കെ ഹംസക്കും ശേഷം മറ്റൊരു മുസ്ലിം നേതാവിനെ ഉയര്‍ത്തിക്കൊണ്ടു വരാന്‍ പാര്‍ട്ടിക്ക് മലപ്പുറത്ത് കഴിഞ്ഞിട്ടില്ല.കെ ടി ജലീല്‍ ആവട്ടെ മറ്റൊരു അന്‍വര്‍ കളിക്കുള്ള തയ്യാറെടുപ്പിലുമാണ്. ഈ സാഹചര്യത്തില്‍ തീവ്ര മുസ്ലിം വിഭാഗങ്ങളുടെ ആരാധനാപാത്രമായ അന്‍വറിനെ ഈ ഘട്ടത്തില്‍ പുറത്താക്കുന്നത് ബുദ്ധിയാവില്ലെന്ന് പാര്‍ട്ടി കരുതുന്നു. അന്‍വറിനോട് നേരിട്ടല്ലെങ്കിലും മുഖ്യമന്ത്രി ആവശ്യമായ മറുപടി നല്‍കി കഴിഞ്ഞു എന്നാണ് പാര്‍ട്ടി വ്യാഖ്യാനം. അന്‍വറിന്റെ അടുത്ത നീക്കങ്ങള്‍ അറിഞ്ഞിട്ടു മാത്രം നടപടി എന്നാണ് തീരുമാനം.
പ്രതികരിക്കാൻ ഇവിടെ എഴുതുക: