തിരുവനന്തപുരം: ആള്‍ ഇന്ത്യ ഇന്‍സ്റ്റിട്യൂട്ട് ഓഫ് മെഡിക്കല്‍ സയന്‍സസ് (എയിംസ്) സ്ഥാപിക്കുന്നത് അവികസിത പ്രദേശങ്ങളില്‍ എവിടെയെങ്കിലും ആയിരിക്കണമെന്ന് കേന്ദ്ര ടൂറിസം സഹമന്ത്രി സുരേഷ് ഗോപി. ഇത് ആ പ്രദേശത്തിന്റെ സാമ്പത്തികവളര്‍ച്ചയ്‌ക്കും അടിസ്ഥാനസൗകര്യ വികസനത്തിനും കാരണമാകുമെന്നും തിരുവനന്തപുരം ഫ്രറ്റേണിറ്റി ഓഫ് ട്രിവാന്‍ഡ്രം പ്രൊഫഷണലുകള്‍ സംഘടിപ്പിച്ച ഇന്ററാക്ടീവ് സെഷന്‍ ഉദ്ഘാടനം ചെയ്തുകൊണ്ട് അദ്ദേഹം പറഞ്ഞു.
പണിമുടക്കുകള്‍ കൊണ്ട് പൂര്‍ണമായും അട്ടിമറിക്കപ്പെട്ട ഒരു സ്ഥലത്ത് എയിംസ് വരണം. അങ്ങനെ ആ പ്രദേശത്തിന്റെ മികച്ച സുസ്ഥിരവികസനം സാധ്യമാക്കാം. അത്തരമൊരു വികസനം റിയല്‍ എസ്‌റ്റേറ്റ്, വാടക വിപണികള്‍ ഉള്‍പ്പെടെയുള്ള പ്രാദേശിക സമ്പദ്‌വ്യവസ്ഥയെ ഉത്തേജിപ്പിക്കും. വികസനത്തിനായി പുതിയ സോണുകള്‍ സൃഷ്ടിക്കപ്പെടണം. കാസര്‍കോടിനാണ് എയിംസ് ആവശ്യമെങ്കില്‍ അത് അവിടെ വരുമെന്നും അദ്ദേഹം പറഞ്ഞു.
വിപുലീകരണത്തിലൂടെ കൊച്ചി മെട്രോയുടെ പ്രവര്‍ത്തനക്ഷമത വര്‍ധിപ്പിക്കാനാകും. മധുരയെ കമ്പം തേനി വഴി വണ്ടിപ്പെരിയാര്‍, മുണ്ടക്കയം, കാഞ്ഞിരപ്പള്ളി, കുമരകം, വൈക്കം, മുഹമ്മ എന്നിവിടങ്ങളില്‍ ബന്ധിപ്പിക്കുന്ന നാലുവരി പാലത്തിന്റെ നിര്‍മാണം ആലപ്പുഴയെ തമിഴ്‌നാട്ടിലൂടെയും രാജ്യത്തിന്റെ മറ്റ് ഭാഗങ്ങളിലൂടെയും ദേശീയപാതയുമായി ബന്ധിപ്പിക്കും. വയനാടിന്റെ പുനര്‍നിര്‍മാണത്തില്‍ സുതാര്യത ഉറപ്പാക്കാന്‍ ഹൈക്കോടതിയുടെ മേല്‍നോട്ടത്തില്‍ കണ്‍സോര്‍ഷ്യം രൂപീകരിക്കണം. സ്വാര്‍ഥ താല്‍പര്യങ്ങള്‍ക്കനുസൃതമാകാതെ ഫണ്ടുകളുടെ സമഗ്രമായ ഓഡിറ്റ് ആവശ്യപ്പെടുന്ന സുതാര്യതയും ഉത്തരവാദിത്തവും ഉറപ്പാക്കുന്നതിനാണ് കണ്‍സോര്‍ഷ്യം രൂപീകരിക്കാന്‍ ആവശ്യപ്പെടുന്നത്. അര്‍ഹതപ്പെട്ട പ്രദേശങ്ങളുടെ വളര്‍ച്ചയ്‌ക്ക് ആവശ്യമായ ശ്രദ്ധയും വിഭവങ്ങളും ലഭിക്കുന്നുണ്ടെന്ന് ഉറപ്പാക്കി വികസനത്തിന് കൂടുതല്‍ നീതിപൂര്‍വകമായ സമീപനം വേണമെന്നും സുരേഷ് ഗോപി പറഞ്ഞു.
സിഎസ്‌ഐആര്‍ എന്‍ഐഐഎസ്ടി ഡയറക്ടര്‍ ഡോ. സി. അനന്തരാമകൃഷ്ണന്‍, രഞ്ജിത് കാര്‍ത്തികേയന്‍, ചാര്‍ട്ടേഡ് അക്കൗണ്ടന്റ് റീജിയണല്‍ കൗണ്‍സില്‍ അംഗം രേഖ ഉമാശിവ്, എന്‍. സുബ്രഹ്മണ്യശര്‍മ, രമാശര്‍മ എന്നിവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: