കൂത്തുപറമ്പ്: റോഡിന് ഉദ്ദേശിച്ചത്ര സ്ഥലം കൊടുത്തില്ലെന്നാരോപിച്ച് അര്‍ധ രാത്രി മണ്ണുമാന്തി യന്ത്രവുമായെത്തി വീട്ടുമതിലും ഗേറ്റും സിപിഎമ്മുകാര്‍ തകര്‍ത്തതായി പരാതി. കഴിഞ്ഞ ദിവസം അര്‍ധ രാത്രിയോടെ വീട്ടുമതിലും ഗേറ്റും തകര്‍ത്തതായി കാണിച്ച് കൂളിക്കടവിനു സമീപം തഫ്സീല മന്‍സിലിലില്‍ പി.കെ. ഹാജിറയാണ് കൂത്തുപറമ്പ് പോലീസില്‍ പരാതി നല്കിയത്. മതില്‍ പൊളിക്കുമ്പോള്‍ വീട്ടിലുള്ളവര്‍ പുറത്തിറങ്ങാതിരിക്കാന്‍ ഗ്രില്‍ കമ്പിക്കഷണം കൊണ്ട് പൂട്ടിയിട്ടു.
കുളിമുറി വഴി കിണറിനു മുകളിലെ ഗ്രില്‍ വഴി പുറത്തിറങ്ങാതിരിക്കാന്‍ ഇതു മാറ്റിവയ്‌ക്കുകയും ചെയ്താണ് മതില്‍ പൊളിച്ചുനീക്കിയത്. ശബ്ദം കേട്ടു പുറത്തിറങ്ങാന്‍ നോക്കിയപ്പോള്‍ മണ്ണുമാന്തി യന്ത്രവുമായി സിപിഎമ്മുകാര്‍ രക്ഷപ്പെട്ടു. ഏറെ പണിപ്പെട്ട് ഗ്രില്‍ തുറന്ന ശേഷമാണ് മതിലും ഗേറ്റും തകര്‍ന്നു വീണതായി കണ്ടത്. ലക്ഷങ്ങളുടെ നഷ്ടമുണ്ടായെന്നു പരാതിയില്‍ പറയുന്നു. കൂത്തുപറമ്പ് പോലീസ് കേസെടുത്ത് അന്വേഷണം തുടങ്ങി.
മട്ടന്നൂര്‍ മുനിസിപ്പാലിറ്റിയും മാങ്ങാട്ടിടം പഞ്ചായത്തും ബന്ധിപ്പിക്കുന്ന കൂളിക്കടവില്‍ പുതിയ പാലം പണിയുന്നതിന്റെ ഭാഗമായി ഹാജിറയുടെ വീടിനു മുമ്പിലെ റോഡ് നവീകരിക്കുന്നുണ്ട്. ആവശ്യമായ സ്ഥലം വിട്ടുകൊടുത്താണ് വീട്ടുമതില്‍ പണിതത്. എന്നാല്‍ വീണ്ടും സ്ഥലം കൊടുക്കണമെന്ന ആവശ്യമുയര്‍ന്നപ്പോള്‍ വേണ്ടത്ര സ്ഥലമുള്ളപ്പോള്‍ പുതുതായുണ്ടാക്കിയ മതിലും ഗേറ്റും പൊളിച്ചുമാറ്റാന്‍ കഴിയില്ലെന്ന് ഇവര്‍ വ്യക്തമാക്കി. ഇതേത്തുടര്‍ന്ന് ഒരാഴ്ച മുമ്പ് ഒരുസംഘം സിപിഎമ്മുകാര്‍ വീട്ടിലെത്തി ഭീഷണിപ്പെടുത്തിയിരുന്നു. ഇതിന്റെ തുടര്‍ച്ചയായാണ് മണ്ണുമാന്തി യന്ത്രം ഉപയോഗിച്ച് ബ്ലോക്ക് പഞ്ചായത്ത് അംഗത്തിന്റെ നേതൃത്വത്തിലുള്ള ഏഴംഗ സിപിഎം സംഘം മതില്‍ പൊളിച്ചതെന്നു ഹാജിറ പറയുന്നു.
പ്രതികരിക്കാൻ ഇവിടെ എഴുതുക: