കോട്ടയം: കറുകച്ചാൽ വാകത്താനത്ത് ബൈക്ക് ലിഫ്റ്റ് ചോദിച്ച് കയറിയ സെക്യൂരിറ്റി ജീവനക്കാരന് ബൈക്ക് അപകടത്തിൽ ദാരുണാന്ത്യം. പൂവൻതുരുത്ത് സ്വദേശി എംജെ സാമുവേൽ ആണ് മരിച്ചത്. കറുകച്ചാലിലെ കന്യാസ്ത്രീ മഠത്തിലെ സെക്യൂരിറ്റി ജീവനക്കാരനായിരുന്നു ഇദ്ദേഹം.
ബൈക്ക് ഓടിച്ചിരുന്ന കുറിച്ചി സ്വദേശി ഷൈജു ജേക്കബ് പരിക്കുകളോടെ ആശുപത്രിയിൽ ചികിത്സയിൽ കഴിയുകയാണ്. ഇന്നലെ പുലർച്ചെ ആറരയോടെയായിരുന്നു സംഭവം. പുതുപ്പള്ളി കറുകച്ചാൽ റോഡിൽ തോട്ടയ്‌ക്കാട് പാറപ്പ വളവിൽ കാറും ബൈക്കും കൂട്ടിയിടിച്ചായിരുന്നു അപകടം. നെല്ലൂർ ഭാഗത്ത് നിന്നുമാണ് സാമുവേൽ ബൈക്കിൽ കയറിയത്.
എതിർ ദിശയിൽ നിന്നും എത്തിയ കാർ ബൈക്കിൽ ഇടിക്കുകയായിരുന്നു. അപകടത്തിൽ റോഡിലേക്ക് തെറിച്ചു വീണ സാമുവലിനെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
പ്രതികരിക്കാൻ ഇവിടെ എഴുതുക: