ഒറ്റപ്പാലം: വീട്ടിലെ കാര്‍പോര്‍ച്ചില്‍ നിര്‍ത്തിയിട്ടിരുന്ന കാറിനുനേരെ തെരുവുനായ്ക്കളുടെ അതിക്രമം. കാറിന്റെ മുന്‍ ഭാഗവും വശവും കടിച്ചും മാന്തിയും കേടുവരുത്തി. ഒറ്റപ്പാലം പാലാട്ട് റോഡ് വിജയ കേസരിയില്‍ വിജയരാഘവന്റെ കാറിന് നേരെയായിരുന്നു പരാക്രമം.
ഇവയെ പേടിച്ച് ജനങ്ങള്‍ക്ക് പുറത്തിറങ്ങാന്‍ കഴിയാതെ വരുന്നതിനിടെയാണ് വാഹനങ്ങള്‍ക്ക് നേരെയും അതിക്രമം. ഷീറ്റിട്ട് മൂടിയിരുന്ന കാര്‍ അഞ്ചോളം തെരുവുനായ്‌ക്കളാണ് കടിച്ചു നശിപ്പിച്ചിരിക്കുന്നത്. ഇവയുടെ പല്ലുകളും നഖവും പതിഞ്ഞ പാടുകള്‍ കൊണ്ട് കാറിന്റെ ഒരുഭാഗം നിറഞ്ഞിട്ടുണ്ട്. മുന്‍വശവും കടിച്ചുപൊളിച്ച നിലയിലാണ്. വീട്ടുകാര്‍ ബഹളം കേട്ട് പുറത്തിറങ്ങിയപ്പോഴാണ് സംഭവം അറിഞ്ഞത്. പെട്രോള്‍ പൈപ്പും കടിച്ചുവലിച്ചു.
വണ്ടി സ്റ്റാര്‍ട്ടാക്കുന്നതിന് 1500 രൂപ ചെലവഴിച്ചാണ് തകരാര്‍ പരിഹരിച്ചതെന്ന് വിജയരാഘവന്‍ പറഞ്ഞു. ഏകദേശം 20,000 രൂപയുടെ നഷ്ടമാണ് സംഭവിച്ചിട്ടുള്ളത്. വീടിന് സമീപത്തെ കുഴല്‍ കിണറിന്റെ പൈപ്പും കടിച്ച് നശിപ്പിച്ചു. കണ്ണിയംപുറത്തും സമാനമായ സംഭവം നടന്നിരുന്നു. ഭാരതപ്പുഴ റോഡ് നിവേദ്യത്തില്‍ മുരളിയുടെ കാറാണ് കടിച്ചുനശിപ്പിച്ചത്.
പ്രതികരിക്കാൻ ഇവിടെ എഴുതുക: