തിരുവനന്തപുരം : വിഴിഞ്ഞത്ത് പോലീസ് സ്റ്റേഷന് നേരെ അടക്കം നടത്തിയത് ആസൂത്രിത ആക്രമണമെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന്‍. ജനാധിപത്യപരമായ സമരങ്ങള്‍ക്ക് സര്‍ക്കാര്‍ എതിരല്ല. വൈദികരുടെ വര്‍ഗീയ പ്രചാരണവും കലാപാഹ്വാനവും ജനം തള്ളിക്കളയും. തിരുവനന്തപുരത്ത് വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.
സമരത്തിന്റെ മറവില്‍ നടത്തുന്ന കലാപാഹ്വാനത്തെയാണ് തള്ളുന്നത്. തുറമുഖ നിര്‍മാണവുമായി മുന്നോട്ട് പോകും. സമരം നടത്തുന്നവര്‍ മുന്നോട്ട് വെച്ച ഏഴ് നിര്‍ദ്ദേശങ്ങളില്‍ ആറ് എണ്ണവും തൊഴിലാളികള്‍ക്കായിരുന്നു. അതെല്ലാം അംഗീകരികരിച്ചു. തുറമുഖത്തെ നിര്‍മാണം അവസാനിപ്പിക്കണമെന്നതായിരുന്നു ഏഴാമത്തേത്. അതിനോട് യോജിക്കാനാകില്ല. മത്സ്യത്തൊഴിലാളികള്‍ മുന്നോട്ടുവെച്ച എല്ലാ ആവശ്യങ്ങളും അംഗീകരിച്ചതാണ്. മത്സ്യത്തൊഴിലാളികളല്ല ഇപ്പോള്‍ സമരം നടത്തുന്നത്.
തിരുവനന്തപുരത്തിന്റേയും സംസ്ഥാനത്തിന്റേയും വികസനത്തിലേക്ക് വഴിവെയ്‌ക്കുന്നതാണ് പദ്ധതി. 50000ല്‍ അധികം നിക്ഷേപവും ഇതിനുണ്ട്. വൈദികന്‍ കഴിഞ്ഞ ദിവസം മന്ത്രിക്കെതിരെ നടത്തിയ പരാമര്‍ശം നാക്കുപിഴയായി കരുതാന്‍ ആകില്ല. വികൃതമായ മനസാണ് വൈദികന്‍ ഇതിലൂടെ പ്രകടിപ്പിച്ചത്. കലാപത്തിനാണ് വൈദികര്‍ ആഹ്വാനം ചെയ്യുന്നത്.
വിഴിഞ്ഞം സമരം തീരരുതെന്ന് ഒരു വിഭാഗം കരുതുന്നു. കഴിഞ്ഞ ദിവസങ്ങളിലുണ്ടായ ആക്രമണങ്ങളില്‍ ആരാണോ കുറ്റവാളി അവര്‍ക്കെതിരെയെല്ലാം കേസുണ്ടാകും. കേരളത്തിന്റെ വളര്‍ച്ചയ്‌ക്ക് ആവശ്യമായ പദ്ധതിയാണ് വിഴിഞ്ഞം. പ്രതിഷേധക്കാര്‍ സമരം അവസാനിപ്പിച്ചാലും ഇല്ലെങ്കിലും വിഴിഞ്ഞം തുറമുഖം പദ്ധതി യാഥാര്‍ത്ഥ്യമാകുമെന്നും എം. വി. ഗോവിന്ദന്‍ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: