കൊല്ലം : കൊട്ടാരക്കരയില്‍ അഭിഭാഷകന് വെടിയേറ്റു. പുലമണ്‍ സ്വദേശി മുകേഷിന്(34) ബുധനാഴ്ച രാത്രി 11 മണിയോടെയാണ് വെടിയേറ്റത്. അയല്‍ക്കാരുമായുള്ള സംഘര്‍ഷമാണ് വെടിവെപ്പിലേക്ക് നീങ്ങിയത്. പരിക്കേറ്റ അഭിഭാഷകനെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
വാക്ക് തര്‍ക്കത്തിനെ തുടര്‍ന്ന് മുകേഷിന്റെ അയല്‍ക്കാരനായ പ്രൈം അലക്‌സ് എന്ന ആളാണ് എയര്‍ഗണ്‍ ഉപയോഗിച്ച് വെടിയുതിര്‍ത്തത്. ഇയാളും മുകേഷും തമ്മില്‍ കുറച്ചുനാളായി അസ്വാരസ്യങ്ങള്‍ നിലനിന്നിരുന്നു. എയര്‍ഗണ്‍ ഉപയോഗിച്ചുള്ള വെടിവെയ്പില്‍ മുകേഷിന്റെ തോളിനാണ് പരിക്കേറ്റത്. പരിക്ക് ഗുരുതരമല്ല. വെടിയുണ്ട പുറത്തെടുക്കാനുള്ള ശസ്ത്രക്രിയ ഇന്ന് നടക്കും.
അലക്‌സ് നിലവില്‍ പോലീസ് കസ്റ്റഡിയിലാണ്. ഇയാള്‍ക്കെതിരെ നിലവില്‍ വധ ശ്രമത്തിനാണ് കേസെടുത്തിരിക്കുന്നത്. അലക്‌സിനെതിരെ സമാന രീതിയില്‍ വേറേയും കേസുകള്‍ രജിസ്റ്റര്‍ ചെയ്തിട്ടുണ്ട്. മുകേഷിന്റെ മൊഴി എടുത്ത ശേഷം കൂടുതല്‍ നടപടികള്‍ സ്വീകരിക്കാനാണ് പോലീസ് തീരുമാനം. അലക്‌സിനൊപ്പം സംഭവസമയം മറ്റൊരാള്‍ കൂടി ഉണ്ടായിരുന്നു. ഇയാളെയും പോലീസ് കസ്റ്റഡിയിലെടുത്തു. ചോദ്യം ചെയ്ത ശേഷം പ്രതിയാക്കുന്ന കാര്യത്തില്‍ തീരുമാനമെടുക്കും.
പ്രതികരിക്കാൻ ഇവിടെ എഴുതുക: