കൊച്ചി : നടിയെ ആക്രമിച്ച കേസ് അന്വേഷിച്ച ഉദ്യോഗസ്ഥരെ കൊല്ലാന്‍ ഗൂഢാലോചന നടത്തിയെന്ന കേസില്‍ ദിലീപിന്റെ സുഹൃത്ത് നാദിര്‍ഷായെ ക്രൈംബ്രാഞ്ച് ചോദ്യം ചെയ്തു. കളമശ്ശേരിയിലെ ക്രൈംബ്രാഞ്ച് ഓഫീസിലേക്ക് വിളിപ്പിച്ചാണ് ചോദ്യം ചെയ്തത്. ഇത് മൂന്ന് മണിക്കൂറോളം നീണ്ടു നിന്നു.
അന്വേഷണ ഉദ്യോഗസ്ഥര്‍ക്കെതിരെ ഗൂഢാലോചന നടത്തിയത് ദിലീപ് പങ്കുവെച്ചിരുന്നോയെന്ന് അറിയുന്നതിനാണ് ക്രൈംബ്രാഞ്ച് സംഘം വിളിപ്പിച്ചത്. നടിയെ ആക്രമിച്ച കേസില്‍ നാദിര്‍ഷ ഫേസ്ബുക്കിലൂടെ ദിലീപിന് അനുകൂലമായി പ്രതികരണങ്ങള്‍ നടത്തിയിരുന്നു. ഇതിന്റെയെല്ലാം അടിസ്ഥാനത്തിലാണ് വിളിപ്പിച്ചത്.
അതേസമയം കേസില്‍ ദിലീപ് അടക്കമുള്ള പ്രതികളെ വീണ്ടും അന്വേഷണ സംഘം ചോദ്യം ചെയ്യും. ദിലീപിന്റെ സഹോദരന്‍ അനൂപിനോട് തിങ്കളാഴ്ച ഹാജരാകാന്‍ ആവശ്യപ്പെട്ടിട്ടുണ്ട്. ഫോറന്‍സിന് ലാബിലേക്ക് അയച്ച അനൂപിന്റെ ഫോണുകളില്‍ ഒന്നിന്റെ പരിശോധനാ ഫലങ്ങള്‍ പുറത്തുവന്നതിനെ തുടര്‍ന്നാണ് ഇപ്പോള്‍ വിളിപ്പിച്ചിരിക്കുന്നത്. ദിലീപ് അടക്കം ബാക്കിയുള്ള പ്രതികളുടെ പരിശോധനാ ഫലം കിട്ടുന്ന മുറയ്‌ക്ക് ഇവരെ ചോദ്യം ചെയ്യാനായി വീണ്ടും വിളിപ്പിക്കും.
ദിലീപിന്റെ സാമ്പത്തിക ഇടപാടുകളും അന്വേഷണ സംഘം പരിശോധിക്കുന്നുണ്ട്. ദിലീപിന്റെ ചാര്‍ട്ടേഡ് അക്കൗണ്ടന്റിനെ കഴിഞ്ഞ ദിവസം ചോദ്യം ചെയ്തിരുന്നു. കണക്കില്‍ പെടാത്ത ഇടപാടുകള്‍ സംബന്ധിച്ച വിവരങ്ങള്‍ ഇദ്ദേഹത്തോട് ചോദിച്ചറിഞ്ഞതായാണ് വിവരം.
പ്രതികരിക്കാൻ ഇവിടെ എഴുതുക: