അട്ടപ്പാടി : ആദിവാസി യുവാവ് മധുവിനെ തല്ലിക്കൊന്ന കേസില്‍ പണം കൊടുത്ത് സാക്ഷിയെ സ്വാധീനിക്കാന്‍ ശ്രമിക്കുന്നതായി കുടുംബം. കേസിലെ പ്രധാന സാക്ഷിയെ രണ്ട് ലക്ഷം രൂപ നല്‍കി സ്വാധീനിക്കാന്‍ ശ്രമിച്ചതായി മധുവിന്റെ സഹോദരി സരസുവാണ് ആരോപിച്ചത്. കുടുംബത്തിന് നേരെ ഭീഷണിയുണ്ടെന്നും കേസ് ഒതുക്കി തീര്‍ക്കാന്‍ ശ്രമിക്കുന്നതായും സരസു അറിയിച്ചു.
കൂറുമാറിയാല്‍ രണ്ടു ലക്ഷം രൂപ നല്‍കാമെന്ന് പറഞ്ഞ് ചിലര്‍ പ്രധാന സാക്ഷിയെ സമീപിച്ചിരുന്നു. എന്നാല്‍ സാക്ഷി അതിന് തയ്യാറായില്ല. ‘ഒരിക്കല്‍ മുഖംമൂടി ധരിച്ച രണ്ടു പേര്‍ വീട്ടിലെത്തി’. കേസില്‍ നിന്നും പിന്മാറാണമെന്നാവശ്യപ്പെട്ട് ഭീഷണിപ്പെടുത്തിയതായും സരസു സ്വകാര്യ മാധ്യമത്തോട് വെളിപ്പെടുത്തി.
മധു കൊലക്കേസ് അട്ടിമറിക്കാന്‍ രാഷ്‌ട്രീയ സമ്മര്‍ദ്ദം ഉള്ളതായി സംശയമുണ്ട്. കേസിന്റെ വിചാരണ നീണ്ടുപോകുന്നതിനെതിരെയും സിബിഐ അന്വേഷണം ആവശ്യപ്പെട്ടും ഹൈക്കോടതിയെ സമീപിക്കാന്‍ തീരുമാനിച്ചതായും മധുവിന്റെ കുടുംബം അറിയിച്ചു. പബ്ലിക് പ്രോസിക്യൂട്ടറെ തെരഞ്ഞെടുക്കുന്ന കാര്യത്തില്‍ ആക്ഷന്‍ കൗണ്‍സിലുമായി കൂടിയാലോചിച്ച് തീരുമാനമെടുക്കുമെന്നും കുടുംബം പറഞ്ഞു.
പ്രതികരിക്കാൻ ഇവിടെ എഴുതുക: