കോഴിക്കോട്: ജില്ലയിലെ ഭക്ഷ്യവിഷബാധ റിപ്പോര്‍ട്ട് ചെയ്ത നാലിടത്തെ വെള്ളത്തില്‍ കോളറ ബാക്ടീരിയയുടെ സാന്നിധ്യം കണ്ടെത്തി. ഭക്ഷ്യ സുരക്ഷാ വകുപ്പിന്റെ നേതൃത്ത്വത്തില്‍ നടത്തിയ പരിശോധനയിലാണ് നരിക്കുനിയിലും പെരുമണ്ണയിലുമാണ് ബാക്ടീരിയ സാന്നിധ്യം ലഭിച്ചത്. സംഭവം വളരെ ഗൗരവതരമാണെന്ന് ഡിഎംഒ ഡോ. ഉമര്‍ ഫാറൂഖ് വ്യക്തമാക്കി.
എന്നാല്‍, ഭക്ഷ്യവിഷബാധയേറ്റ് ചികിത്സയിലായവരില്‍ കോളറ ലക്ഷണങ്ങള്‍ ഇല്ലെന്നും ആശുപത്രി റിപ്പോര്‍ട്ട് വ്യക്തമാക്കി. നരിക്കുനിയിലെ മൂന്ന് കിണറുകളിലേയും പെരുമണ്ണയിലെ ഒരു കിണറിലേയും വെള്ളത്തിലാണ് വിബ്രിയോ കോളറെ ബാക്ടീരിയയുടെ സാന്നിധ്യം കണ്ടെത്തിയത്. ഡിഎംഒ അടിയന്തരമായി വിളിച്ച് ചേര്‍ത്ത ആരോഗ്യ സൂപ്പര്‍ വൈസര്‍മാരുടെ യോഗത്തില്‍ കിണറുകള്‍ സൂപ്പര്‍ ക്ലോറിനേഷന്‍ നടത്താന്‍ നിര്‍ദ്ദേശം നല്‍കി.
അതേസമയം നരിക്കുനിയില്‍ രണ്ടര വയസുകാരന്റെ മരണകാരണം ഭക്ഷ്യവിഷബാധയാണെന്ന് മെഡിക്കല്‍ കോളജ് റിപ്പോര്‍ട്ട് വ്യക്തമാക്കി. പോസ്റ്റ്‌മോര്‍ട്ടം റിപ്പോര്‍ട്ടിനെ തുടര്‍ന്ന് മാത്രമെ ഇതില്‍ കൂടുതല്‍ വ്യക്തത ലഭിക്കു. നിലവില്‍ ജില്ലയില്‍ ഒരിടത്തും കോളറ സ്ഥിരീകരിച്ചിട്ടില്ല. വരും ദിവസങ്ങളില്‍ ജില്ലയില്‍ വിവിധ പ്രദേശങ്ങളിലെ കിണറുകളില്‍ റാന്‍ഡം പരിശോധന നടത്താനും ആരോഗ്യ വകുപ്പ് തീരുമാനിച്ചു.
പ്രതികരിക്കാൻ ഇവിടെ എഴുതുക: