കരുനാഗപ്പള്ളി: കൊവിഡ് ബാധിച്ച് മരിച്ചയാളുടെ മൃതദേഹം ചട്ടം ലംഘിച്ച് അടക്കം ചെയ്തതിനെതിരെ ആരോഗ്യ വകുപ്പിന്റെ പരാതിയുടെ അടിസ്ഥാനത്തില്‍ പോലീസ് കേസെടുത്തു.
തഴവ പഞ്ചായത്തിലെ 20-ാം വാര്‍ഡില്‍ താമസിക്കുന്ന കളത്തില്‍ കിഴക്കതില്‍ അബ്ദുള്‍ മജീദ്(55) ആണ് മരിച്ചത്. ജൂണ്‍ നാലിനാണ് കൊവിഡ് സ്ഥിരീകരിച്ചത്. 11ന് മരിച്ചു. ബന്ധുക്കള്‍ക്ക് വിട്ടുകൊടുത്ത മൃതദേഹം കുലശേഖരപുരം കടത്തൂരുള്ള മകളുടെ വീട്ടില്‍ കൊണ്ടുവരികയും, മതാചാരപ്രകാരമുള്ള ചടങ്ങുകള്‍ക്ക് ശേഷം പള്ളിയില്‍ അടക്കം ചെയ്യുകയുമുണ്ടായി. ചടങ്ങില്‍ നിരവധി ബന്ധുമിത്രാദികള്‍ പങ്കെടുത്തതായി ആരോഗ്യ വകുപ്പ് അധികൃതര്‍ പോലീസില്‍ നല്‍കിയ പരാതിയില്‍ പറയുന്നു.
വിവരം അറിഞ്ഞ് പോലീസ് എത്തിയപ്പോഴേക്കും ചടങ്ങുകള്‍ പൂര്‍ത്തിയാക്കി മൃതദേഹം പള്ളിയില്‍ അടക്കം ചെയ്തതായി കണ്ടെത്തി. സംഭവം കളക്ടര്‍, ഡിഎംഒ ഉള്‍പ്പെടെ മേലധികാരികളെ അറിയിച്ചതായും ബന്ധപ്പെട്ട ഉദ്യോഗസ്ഥര്‍ അറിയിച്ചു. ആയിരത്തിനടുത്ത് പോസിറ്റീവ് രോഗം റിപ്പോര്‍ട്ടു ചെയ്ത പഞ്ചായത്തില്‍ ശക്തമായ നിയന്ത്രണങ്ങള്‍ ഏര്‍പ്പെടുത്തി രോഗം നിയന്ത്രിച്ചിരുന്നതാണ്.
പ്രതികരിക്കാൻ ഇവിടെ എഴുതുക: