മലപ്പുറം: മിണ്ടാപ്രാണിയോട് വീണ്ടും ക്രൂരത, മലപ്പുറം എടക്കരയില്‍ വളര്‍ത്തുനായയെ ഉടമ സ്‌കൂട്ടറില്‍ കിലോമീറ്ററുകളോളം കെട്ടിവലിച്ചു. ഇന്നലെ വൈകിട്ട് അഞ്ചുമണിയോടെ എടക്കര പെരുങ്കുളത്താണ് സംഭവം. വണ്ടിക്ക് ഒപ്പമെത്താന്‍ കിണഞ്ഞ് പരിശ്രമിക്കുന്ന നായയെ കണ്ട് നാട്ടുകാര്‍ ഇവര്‍ക്ക് പിന്നാലെ കൂടിയെങ്കിലും വാഹനം നിര്‍ത്താന്‍ ഉടമ തയ്യാറായില്ല. ഒടുവില്‍ നാട്ടുകാര്‍ വാഹനം വളഞ്ഞ് പിടികൂടുകയായിരുന്നു.
പെരുങ്കുളം മുതല്‍ മുസ്ല്യാരങ്ങാടി വരെ മൂന്ന് കിലോമീറ്ററോളം ദൂരമാണ് നായയെ കെട്ടിവലിച്ചത്. നായക്ക് സാരമായി പരിക്കേറ്റിട്ടുണ്ട്. എടക്കര സ്വദേശിയായ ഉമ്മര്‍ എന്ന വ്യക്തി വീഡിയോ സഹിതം സംഭവം ഫെയ്സ്ബുക്കില്‍ പങ്കുവെച്ചതോടെയാണ് ഈ ക്രൂരത പുറംലോകമറിഞ്ഞത്.
ഔദ്യോഗികമായി പരാതി ലഭിച്ചിട്ടില്ലെങ്കിലും എടക്കര പോലീസ് അന്വേഷണം ആരംഭിച്ചിട്ടുണ്ട്. ദൃക്സാക്ഷിയായ ഉമ്മറിനോട് രേഖാമൂലം പരാതി നല്‍കാന്‍ ആവശ്യപ്പെട്ടിട്ടുണ്ടെന്നും സംഭവത്തില്‍ കര്‍ശന നടപടി സ്വീകരിക്കുമെന്നും എടക്കര പോലീസ് വ്യക്തമാക്കി.
പ്രതികരിക്കാൻ ഇവിടെ എഴുതുക: