തിരുവനന്തപുരം: എംഎല്‍എ അപ്രത്യക്ഷനായെന്നും ഇപ്പോള്‍ ഘാനയില്‍ ജയിലിലാണെന്നുമുള്ള പ്രചാരണങ്ങള്‍ക്ക് ഫേസ് ബുക്ക് ലൈവിലെത്തി മറുപടി നല്‍കി പി വി അന്‍വര്‍ എംഎല്‍എ.
താന്‍ കാനയിലും കനാലിലുമൊന്നുമല്ലെന്നും, സിയെറ ലിയോണ്‍ എന്ന ആഫ്രിക്കന്‍ രാജ്യത്ത് ഖനി ബിസിനസ് നടത്തുകയാണെന്നും അന്‍വര്‍ ഫേസ് ബുക്ക് ലൈവില്‍ വിശതീകരിച്ചു. ഒരു കൗബോയ് തൊപ്പിയും കൂളിംഗ് ഗ്ലാസും ധരിച്ചാണ് എംഎല്‍എ ലൈവില്‍ പ്രത്യക്ഷപ്പെട്ടത്.
മുഖ്യമന്ത്രിയെയും പാര്‍ട്ടി നേതൃത്വത്തെയും അറിയിച്ചാണ് യാത്ര പോയതെന്നും നാട്ടിലേക്ക് മടങ്ങാനിരിക്കെ കൊവിഡ് ബാധിച്ചതിനാലാണ് മടക്കയാത്ര വൈകുന്നതെന്നും എംഎല്‍എ വീഡിയോയില്‍ അറിയിച്ചു. ഫേസ്ബുക്ക് ലൈവിലൂടെയാണ് എംഎല്‍എ പ്രതികരിച്ചത്. ഘാനയില്‍ ജയിലിലാണെന്ന പ്രചാരണത്തിന് എതിരെ നിയമനടപടി സ്വീകരിക്കുമെന്നും എംഎല്‍എ. കുറിപ്പില്‍ പറയുന്നു. കഴിഞ്ഞ ദിവസങ്ങളിലായിരുന്നു എംഎല്‍എയ്‌ക്കെതിരായ ആക്രമണം യൂത്ത് കോണ്‍ഗ്രസ് പ്രവര്‍ത്തകര്‍ സമൂഹമാധ്യമങ്ങളില്‍ ശക്തമാക്കിയത്.
എംഎല്‍എയുടെ ഫേസ് ബുക്ക് കുറിപ്പ്:
എന്നെ ഇത്രമാത്രം സ്‌നേഹിക്കുന്ന
പ്രിയപ്പെട്ട ഊത്ത് കോണ്‍ഗ്രസുകാരേ..
മൂത്ത കോണ്‍ഗ്രസുകാരേ..
നിങ്ങളുടെ സ്‌നേഹം ഇത്രനാളും മനസിലാക്കാന്‍ കഴിഞ്ഞില്ല ഏന്ന കുറ്റബോധം എനിക്കിന്നുണ്ട്..
ആദ്യമേ പറയാമല്ലോ..
ഞാന്‍ കാനയിലും കനാലിലുമൊന്നുമല്ല..
ഇപ്പോളുള്ളത് ആഫ്രിക്കന്‍ രാജ്യമായ സിയെറ ലിയോണിലാണ്.
ഇനി കാര്യത്തിലേക്ക് വരാം..
രാഷ്‌ട്രീയം എന്റെ ഉപജീവന മാര്‍ഗ്ഗമല്ല..
അതിന്റെ പേരില്‍ നഷ്ടപ്പെടുത്തിയതല്ലാതെ ഒന്നും സമ്പാദിച്ചിട്ടുമില്ല. ജീവിതമാര്‍ഗ്ഗം ഏന്ന നിലയില്‍ ഒരു പുതിയ സംരംഭവുമായി ഇവിടെ എത്തിയതാണ്. പ്രവര്‍ത്തനങ്ങള്‍ പ്രാരംഭ ഘട്ടത്തിലാണ്. ഈ രാജ്യത്തെ നിയമവ്യവസ്ഥകള്‍ക്ക് വിധേയമായി സര്‍ക്കാര്‍ സഹായത്തോടെ കൂടിയാണ് ഇവിടെ കമ്പനിയുടെ പ്രവര്‍ത്തനങ്ങള്‍ ആരംഭിച്ചിട്ടുള്ളത്.
നൂറോളം തൊഴിലാളികള്‍ ഒപ്പമുണ്ട്. കൂടുതല്‍ വിശദമായി കാര്യങ്ങള്‍ വിഡിയോയില്‍ പറയുന്നുണ്ട്..
(വിഡിയോ ആദ്യാവസാനം നിങ്ങള്‍ കാണണം. എങ്കിലേ പുതിയ തിരക്കഥകള്‍ക്കുള്ള ത്രെഡ് കിട്ടൂ.)
പ്രതികരിക്കാൻ ഇവിടെ എഴുതുക: